رووداو دیجیتاڵ
وێڕای پەیوەندییە بەهێزەکەیان، دۆناڵد ترەمپ، سەرۆکی ئەمریکا پێناسی گومرگی بەسەر ئیسرائیلیشدا سەپاند.
ترەمپ کە چوارشەممە پێناسی گومرگی بەسەر زۆربەی وڵاتاندا سەپاندن، باجێکی 17٪ی لەسەر هاوردەی ئیسرائیلی داناوە، بەوەش ئیسرائیل دەبێتە لەو وڵاتانەی رۆژهەڵاتی نێوەڕاست کە زۆرترین زیانی پێدەگات، سەرەڕای ئەوەی کە نزیکترین هاوپەیمانی ئەمریکایە.
بڕیارەکە وێڕای ئەوە هات کە ئیسرائیل، رۆژێک پێش راگەیاندنی پێناسی گومرگی لە لایەن ترەمپەوە، هەموو باجەکانی لەسەر کاڵای ئەمریکی لابرد.
بەرپرسانی ئیسرائیلی سەرسوڕمان و نیگەرانیی خۆیان دەربڕی.
بهای شیکل بەرامبەر دۆلار رۆژی پێنجشەممە تا 1.1٪ دابەزی. پێنوێنی بازاڕەکانی ئیسرائیلیش بە رێژەی 0.6٪ دابەزین.
بیتسلەئیل سمۆتریچ، وەزیری دارایی ئیسرائیل رایگەیاند، دەستبەجێ ئەندامانی وەزارەتەکەی کۆدەکاتەوە بۆ گفتوگۆکردن لەسەر هەنگاوەکانی داهاتوو.
سمۆتریچ لە تۆڕی کۆمەڵایەتیی ئێکس نووسیویەتی: "ئێمە دەرفەت و مەترسییەکان شیدەکەینەوە و رێگەچارە دادەڕێژین، لەگەڵ سەرۆک ترەمپ و تیمەکەی و لەگەڵ کەرتی پیشەسازی ئیسرائیلیش کاردەکەین".
بەرپرسێکی وەزارەتی دارایی ئیسرائیل، باسی لەوە کرد، بە نەتەنیاهوو و سمۆتریچ رادەگەیێنن کە پێناسی گومرگی بەسەر کاڵای ئەمریکادا نەسەپێن و لە بری ئەوە راستەوخۆ لەگەڵ ترەمپدا دانوستاندن بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ