وەزیری بەرگریی ئەمریکا لە ژاپۆنەوە هەڕەشە لە چین دەکات: "بەرپەرچدانەوەی تووندمان"

لە ژاپۆن، دووەم و کۆتا وڵات لە گەشتەکەی پیت هێگسەس بۆ ناوچەی ئاسیا، کە بە فیلیپین دەستیپێکرد؛ ئەو وەزیرە تەمەن 44 ساڵە ئەمریکییە جەختی لە "گەرەنتیکردنی" ئاسایشی ناوچەی هەردوو زەریای هیندی و ئارام لەدژی هەڕەشە سەربازییەکانی چین کردەوە.

پیت هەگسەس، وەزیری بەرگریی ئەمریکا گوتیشی، "ئەمریکا گەرەنتیی بەرپەرچدانەوەیەکی تووند، خێرا و روون دەکات لەو ناوچەیە دا، لەنێویاندا گەرووی تایوان" هێرشیشی کردە سەر چین و هەڕەشەکانی لەو ناوچەیە بە "دوژمنکاری و سەرکوتکاری" ناوبرد.

دوورگەی تایوان، یەکێکە لەو بابەتە ئاڵۆزانەی بەردەوام وەک گەورەبەربەستی نێوان ئاساییبوونی پەیوەندییەکانی پەکین و واشنتن تەماشا دەکرێت.

ئەمریکا، بە گوێرەی یاسایەکی کۆنگرێس کە لە 1978 دەرکرا، خۆی پابەند کردووە بەوەی هاوکاریی سەربازی و لۆجستی تایوان بکات لەدژی هەر هەڕەشەیەک کە رووبەڕووی ببێتەوە، لە کاتێکدا چین، دوورگەکە بە بەشێكی وڵاتەکەی دەزانێت و داوای گەڕاندنەوەی بۆ ژێر سەروەری خۆی دەکات.

لە کۆنفرانسە رۆژنامەڤانییە هاوبەشەکەی دا لەگەڵ جەنەرال ناکاتانی، هاوتا ژاپۆنییەکەی لە تۆکیۆ، هێگسەس رایگەیاند "لە ئەگەری هەر دۆخێكی نائاسایی و نەخوازراو دا کە لە ناوچەی رۆژئاوای زەریای ئارام بێتە پێشەوە، ژاپۆن لە هێڵی پێشەوە دا دەبێت و ئەمریکا و ژاپۆن پێکەوە بەهێزەوە پشتگیری لە یەکدی دەکەن لەو ناوچەیە دا".

لە چەند ساڵی کەمی رابردوودا، بەتایبەتی لە 4 ساڵی سەردەمی ئیدارەی جۆ بایدن، چین ئامادەکاری سەربازی، راهێنان و مانۆڕەکانی لە ناوچەی ناسراو بە " دەریای باشووری چین" زیاتر کردووە؛ لە 2022ـوە گەشتە ئاسمانییە سەربازییەکانی بەسەر دوورگەی تایوان زیاتر کردووە و بە دووریشی نازانێت هێز بەکاربهێنێت بۆ "وەرگرتنەوەی" تایوان.

هێگسەس گوتی "کۆبوونەوەمان لەگەڵ هاوتا ژاپۆنییەکانمان بەهێزیی لە رادەبەدەری هاوپەیمانیی ئەمریکا و ژاپۆن دەردەخات؛ هەروەها ئەو راستییەش دەسەلمێنێت؛ ئەو هاوپەیمانیێتییە بەردی بناخەی ئاشتی و سەقامگیریی ناوچەکەیە، هەروەها وەکو بنەمایەکی سەرەکیی گفتوگۆکانی پەیوەست بە ئاشتی ناوچەکە تەماشای دەکەین".

هێگسەس هێرشی کردە سەر چین و گوتی "ئەمریکا و ژاپۆن، پێکەوە بە توندی لەبەردەم کردە دوژمنکار و سەرکوتکارانەکانی چینی کۆمێنیست دەوەستن".