ژاپۆن گەورەترین رۆبۆتی مێژوو نمایشدەکات

ژاپۆن ناوێکە گرێدراوە لەگەڵ تەکنەلۆژیا، ئێستا بە نمایشکردنی گەندام  Gundam robot ، گەورەترین و پێشکەوتووترین رۆبۆتی مێژووش بەناوی خۆیەوە تۆماردەکات.

رۆبۆتەکە لەسەر شێوەی کارەکتەرێکی بەناوبانگی ئەنیمەیشنە بەناوی 'mobile suit Gundam'  کە لە ساڵانی حەفتاکان پەخشدەکرا. لە تایبەتمەندییەکانی رۆبۆتەکە ئەوەیە کە دەتوانێت جووڵە بکات و بڕوات تەنانەت چۆک دابنێت.

لە ساڵی 2014وە ئەندازیاران کاری لەسەر دەکەن و بەوردی چاودێریی هەموو پارچە جووڵاوەکانی دەکەن کە لە زیاتر لە 200 پارچە پێکدێت، بۆ ئەوەی دڵنیابن هەموویان بەبێ کێشە و بە تەواوی دەتوانن جووڵە بکەن.

بڕیاربوو رۆبۆتەکە لە ئۆکتۆبەری ئەمساڵ بە ئامادەبوونی خەڵک نمایشبکرێت، بەڵام بەهۆی ڤایرۆسی کۆرۆنا و رێکارەکانی خۆپارێزییەوە نەیانتوانیوە ئەو کارە بکەن. یەکەم تاقیکردنەوەشی لە رۆژی 21-9-2020 لە یوکوهامای ژاپۆن بە سەرکەوتوویی ئەنجامدرا . لە تاقیکردنەوەکە بەتەواوی دەیتوانی بڕوات، پەنجەکانی بجووڵێنێتەوە و چۆکیش دابدات.

بەرهەمهێنەرانی رۆبۆتەکە لەکاتی نمایشکردنیدا داوای لێبوردنیان لە هەموو ئەو کەسانە کرد کە چاوەڕێی نمایشکردنی بوون و رایانگەیاند، "ئامادەکاریی تەواودەکەین بۆ ئەوەی لەکۆتایی ئەمساڵ خەڵک لە نزیکەوە رۆبۆتەکە ببینن".

ئەنیمەیشن سەرەتا لە ساڵی 1900 سەریهەڵدا کاتێک بۆ یەکەمجار ئۆتین شیمۆکاڤا هونەرمەندی ژاپۆنی یەکەم ئەزموونی خۆی لە فیلمی ئەنیمەیشن بەکارهێنا.

لە جەنگی جیهانی دووەم ئەم کارە پەرەی پێدرا، کاتێک حکومەتی ژاپۆن فەرمانیکرد بە دروستکردنی وێنەی جووڵاو بۆ بەرهەمهێنانی فیلمی رێکلامی بۆ کارکردنەسەر هەست و سۆزی بینەران.

ئەگەرچی رۆبۆت بۆ هۆگرانی تەکنەلۆژیا هەمیشە جێی سەرنجە، بەڵام لەلای بەشێکی خەڵکی جیهانیش بە مەترسیی دەزانرێت. بەگوێرەی راپۆرتە جیهانییەکان بەرزبوونەوەی ژمارەی رۆبۆتەکان وەک شوێنگرەوەیەک بۆ مرۆڤ، کار دەکاتە سەر بەرزکردنەوەی رێژەی بێکاری لە ساڵانی داهاتوو.