رووداو دیجیتاڵ
کۆمپانیای فڕۆکەوانیی لوفتهانزای ئەڵمانی رایگەیاند، بەهۆی مانگرتنی یەک رۆژەی فڕۆکەوانان و ستافی خزمەتگوزاریی ناو فڕۆکەکانەوە، نزیكەی 800 گەشتی ئاسمانی هەڵوەشێندراونەتەوە، ئەمەش بووەتە هۆی مانەوە و گەشت نەکردنی زیاتر لە 100,000 گەشتیار.
بەپێی زانیارییەکانی ماڵپەڕی فڕۆکەخانەکان، هەریەکە لە فڕۆکەخانەکانی فڕانکفۆرت، بەرلین، هامبۆرگ و دوسڵدۆرف بە رێژەیەکی بەرچاو زیانیان بەرکەوتووە و گەشتەکانیان راگیراون. لە بەرامبەردا، زۆربەی گەشتەکانی فڕۆکەخانەی میونشن بەپێی خشتەی دیاریکراوی خۆیان کراون.
لوفتهانزا بە سەرکۆنەی مانگرتنەکەی کرد و رایگەیاند، ئەم هەنگاوە "کاریگەرییەکی زۆر سەخت و ناڕەوای" لەسەر گەشتیاران دروست کردووە. جگە لە هێڵی سەرەکیی لوفتهانزا، هەریەکە لە هێڵەکانی دیسکەڤەر ئێرلاینز و یۆرۆ وینگز و گەشتەکانی کارگۆش (گواستنەوەی کەلوپەل) کەوتوونەتە ژێر کاریگەریی مانگرتنەکە.
هۆکاری مانگرتنەکە و داواکارییەکان
بانگەشەی مانگرتنەکە لەلایەن سەندیکای فڕۆکەوانانی (VC) و سەندیکای ستافی ناو فڕۆکەی (UFO)ـەوە کراوە. فڕۆکەوانەکان داوای باشترکردنی تایبەتمەندییەکانی خانەنشینی دەکەن. لە لایەکی دیکەوە، سەندیکای UFO رایگەیاندووە، ئەندامەکانیان بەهۆی پلانی کۆمپانیاکە بۆ داخستنی لقی (CityLine) و "رەتکردنەوەی دانوستاندن بۆ داڕشتنی پلانێک" دەستیان لە کار کێشاوەتەوە.
قەیرانی دارایی و کەمکردنەوەی فەرمانبەران
لوفتهانزا ساڵێك پێش ئێستا رایگەیاندبوو، بەش و کارمەندانی CityLine دەگوازرێنەوە بۆ لقێکی نوێ، ئەوەش وەک هەوڵێک بۆ کەمکردنەوەی تێچووەکان و کۆنترۆڵکردنی قەرزە کەڵەکەبووەکانی کۆمپانیاکە. قازانجی ئەم کۆمپانیایە لە چاو رکابەرە ئەورووپییەکانیدا دابەزیوە، هەر بۆیە لە مانگی ئەیلوولی رابردوودا رایگەیاند کە 4,000 هەلی کار (نزیكەی 4٪ـی کۆی هێزی کارەکەی) کەم دەکاتەوە.
لوفتهانزا کە گەورەترین گرووپی فڕۆکەوانییە لە ئەورووپا، چەندین هێڵی جیهانیی وەک هێڵی ئاسمانیی سویسڕا و نەمسا و هێڵی ئاسمانیی برۆکسل لەخۆ دەگرێت. بەرپرسانی کۆمپانیاکە دەڵێن هەموو هەوڵێک دەدەن بۆ ئەوەی زیانەکانی سەر گەشتیاران کەم بکەنەوە.
