رووداو دیجیتاڵ
لای کریستیانەکانیش لە چوارشەممەی داهاتووەوە تاوەکو نێوەڕاستی مانگی نیسان مانگی رۆژووگرتنە. پاپا فرەنسیس داوا لە ئیماندارانی کریستیان دەکات لەکاتی رۆژووگرتندا ژیانی خۆیان بەراورد بکەن بە ژیانی پەنابەران و کۆچبەران.
پاپا فرانسیس، پاپای ڤاتیکان پێش ئەوەی نەخۆش بکەوێت و بکەوێتە نەخۆشخانە، پەیامێکی بۆ ئیماندارانی کریستیان ئامادە کردووە. پەیامەکە ئەم هەفتەیە لەلایەن ڤاتیکانەوە بڵاوکراوەتەوە و تێیدا پاپا داوا لە کریستیانەکان دەکات، لە ماوەی رۆژووگرتندا کۆچبەرانیان لەبیربێت.
پاپای ڤاتیکان دەڵێت، وا هەست بکەن بەڕێگەوەن بۆ سەردانێکی پیرۆز و بەرەو هیوا. ئەو دەڵێت، بە خۆخستنە شوێنی کۆچبەران، زۆرتر هەست بە هاوسۆزی دەکەن و بۆتان دەردەکەوێت خوا چیی لێمان دەوێت.
پاپا فرانسیس بەوە بەنێوبانگە کە هەمیشە هانی کریستیانەکان دەدات پشتیوانی لە کۆچبەران بکەن، هانی حکومەتەکانی ئەورووپا و وڵاتانی دیکەی رۆژئاواییش دەدات لەگەڵ کۆچبەران بە بەزەیی بن.
