هەڵبژاردنی کوردستان و ئەزموونی من لە بەریتانیا

 

بڕیارە لە 20ـی ئۆکتۆبەری ئەم ساڵ، هەڵبژاردنی پەرلەمانی کوردستان بکرێت و ئەمڕۆ بە فەرمی هەڵمەتی هەڵبژاردن دەستیپێکردووە. ئەمە لە کاتێکدایە کە شەڕی غەززە تاوەکو کاتی هەڵبژاردن ساڵێک تێدەپەڕێنێت و هیچ هێمایەکیش بۆ راگرتنی بەدیناکرێت، خەریکە لوبنانیش پەلکێشی ئەو شەڕە دەکرێت، لەلایەکی دیکەشەوە شەڕی ئۆکرانیا و رووسیا 32 مانگە بەردەوامە و تاوەکو دێت چڕتر دەبێت. ئەم دوو شەڕە کاریگەرییان لەسەر هەموو هاوکێشە سیاسی و ئابوورییە جیهانی و هەرێمییەکان هەیە و کوردستان و عێراقیش بەدەرنین لە کاریگەری هاوکێشە جیهانی و هەرێمییەکان. کاریگەریی ئێران بە پلەی یەکەم دواتریش تورکیا و عێراق لەسەر چۆنیەتیی بەڕێوەچوون و دەرئەنجامەکانی ئەم هەڵبژاردنە دەبێت. 

 

 

یەکەم هەڵبژاردنی پەرلەمانی کوردستان لە 19-5-1992 بەڕێوەچوو کە 967 هەزار و 229 کەس بەشدارییان تێداکرد و 100 ئەندامیان بۆ پێکهێنانی یەکەمین پەرلەمانی کوردستان هەڵبژارد. 13 ساڵی پێچوو بۆ ئەنجامدانی هەڵبژاردنی دووەم کە لە 30-1-2005 بە بەشداریی یەک ملیۆن و 753 هەزار و 919 کەس بۆ هەڵبژاردنی 111 ئەندام بەڕێوەچوو. دواتریش لە ساڵەکانی 2009، 2013 و 2018 هەڵبژاردنی دیکە کران و بڕیارە 20-10-2024 هەڵبژاردنی خولی شەشەمی پەرلەمانی کوردستان بکرێت، دوای دوو ساڵ دواخستن. 

 

لە ماوەی ئەم 32 ساڵەدا، گۆڕانکاریی ئێجگار زۆری ناوخۆیی، ناوچەیی، جیهانی روویانداوە و گۆڕانکاریی گەورەش بەسەر ئاستی مامەڵەکردنی دەنگدەر و مەیل و چۆنیەتی دەنگدانی دا هاتووە. خەڵک بەو پەرۆش و گەرموگوڕییەی جاران بایەخ بە هەڵبژاردن نادەن و ئومێد و متمانەیان بە پارت و سەرکردە سیاسییەکان نەماوە و متمانە لەنێوان دەسەڵات و میللـەت لە نزمترین ئاستدایە.

 

هەرچەندە کولتووری هەڵبژاردن و پیادەکردنی سیستمی لیبراڵ دیموکراسی تەمەنی 32 ساڵە لە کوردستان و 19 ساڵیش لە سەرتاسەری عێراق، بەڵام پرۆسەی هەڵبژاردن و حکومڕانی پشت بەستوو بە خەڵکی خاوەن ئەزموون زۆر لاوازە و هیچ بایەخێک بە خزمەتکردنی هاووڵاتی نادرێت. لەوکاتەوەی دەنگدەر دەچێتە سەر سندووقی دەنگدان و بڕیار لەسەر لیستێک یان بەربژێرێک دەدات، رۆڵ و بایەخی نامێنێت تاوەکو هەڵبژاردنێکی دیکە! ئەزموونی هەڵبژاردن لە هەرێمی کوردستان 13 ساڵ لە عێراق کۆنترە، بەڵام بە هەڵەدا ناچین ئەگەر بڵێین پەرلەمانی عێراق باشتر کارەکانی رادەپەڕێنێت لەوەی کوردستان و پڕۆسەی هەڵبژاردنیش لەوێ لە پێشترە لەوەی هەرێمی کوردستان.

 

 

لە سایەی سیستمی حوکمڕانیی لیبراڵ دیموکراسی دا، کە سەرجەم وڵاتانی رۆژئاوا و ئەندامانی ناتۆ و یەکێتیی ئەورووپا و وڵاتە پێشکەوتووەکانی جیهان پیادەی دەکەن، هەر چوار یان پێنج ساڵ جارێک هەڵبژاردنی گشتی دەکەن، براوەی هەڵبژاردنیش حکومەت پێکدەهێنێت و دۆڕاویش دەبێتە ئۆپۆزیسیۆن و بە پاڵپشتی میدیای ئازاد چاودێری و وردبینی بۆ سەرەجەم کار و پڕۆژەکانی حکومەت دەکات. لە پەرلەمانیش لە رێگەی ئەندامێتیی کۆمیتە جیاجیاکانەوە پێداچوونەوە و وردبینی بۆ کاری رۆژانەی حکومەت دەکات و خۆی ئامادە دەکات بۆ هەڵبژاردنی داهاتوو. لە رۆژئاوا، لە سایەی سیستمی لیبراڵ دیموکراسی دا، رۆڵی دەنگدەر دوای هەڵبژاردن تەواو نابێت، بە پێچەوانەوە، دەبێت بەپێی یاسا لە هەموو بڕیارە گرنگ و چارەنووسسازەکان دا پرسیان پێبکرێت لە رێگەی گشتپرسی بۆ کار و پڕۆژەی چارەنووسساز و راوێژپێکردنیش لەو پڕۆژانەی کە کاریگەری لەسەر ژیانی خەڵک هەبێت.

 

 

یەکەم: ئەو پارتەی کە لە هەڵبژاردن دەیباتەوە حکومەت پێکدەهێنیت، ئینجا چ بە تەنیا یان بە هاوپەیمانی لەگەڵ پارتێک یان چەند پارتێکی دیکە(لەسەر بنەمای بەڵێنی هەڵبژاردن).

دووەم: ئەو پارتەی کە بە پلەی دووەم هاتووە بە فەرمی سەرکردایەتی فراکسیۆنی ئۆپۆزیسیۆن دەکات و لێپێچینەوەی رۆژانە لە کار و پڕۆژەکانی حکومەت دەکات (لە رێگەی حکومەتی سێبەرەوە).

سێیەم: فەرمانبەرانی حکومەت و دامەزراوەکانی دەوڵەت کە بڕبڕەی پشتی دەوڵەتن، بە یاسا قەدەخەکراون لە ئەندام بوون لە پارتە سیاسییەکان، بەڵام ئازادن لە دەنگدان.

چوارەم: میدیای ئازاد.

پێنجەم: سیستمی سەربەخۆی دادوەری.

 

هەموو ئەوانە لە دەرئەنجامدا میللـەتێکی هۆشیار و زیندوو بەرهەم دەهێنن و باش دەزانێت لە رێگەی سندووقی دەنگدانەوە سزای ئەو پارتانە بدات کە بەڵێنەکانیان جێبەجێ ناکەن و لە خزمەتکردنی وڵات و خەڵک کەمتەرخەمن. هەرێمی کوردستان هەر لە سەرەتای دامەزراندنییەوە بە رەزامەندی و پشتیوانیی بەردەوامی چەتری هەر سێ وڵاتانی رۆژئاوایی ئەندامی هەمیشەیی ئەنجوومەنی ئاسایشی نێودەوڵەتی، کە بریتین لە ویلایەتە یەکگرتووەکانی ئەمریکا، شانشینی یەکگرتوو و فەرەنسا تائێستاش پشتگیری لێکراوە و ئەو پشتگیرییە بەردەوامە.

 

ئەگەر پشتیوانی و پاراستنی وڵاتانی رۆژئاوایی نەبێت بۆ هەرێمی کورستان، رەنگە ئەو حکومەتە خۆجێییەی کوردستان زۆر خۆی نەگرێت و بکەوێتە ژێر هەڕەشە بە نەهێشتنی ئەم هەرێمەشەوە. لە بەرامبەر ئەم پشتیوانییە بێهاوتایەدا، ئەم وڵاتانە و هاوپەیمانەکانیان کەمترین چاوەڕوانییان لە گەلی کوردستان ئەوەبووە کە بەلانی کەم سیستیمی لیبراڵ دیموکراسی لە حوکمڕانیدا پیادە بکەن! کەچی ئێمە (گەلی کوردستان) سەرەڕای ئەم هەموو پشتیوانییە زۆرەی زلهێزان و ئەو هەموو پارە و پوولە زۆرەی ژێر دەستمان و دوای 32 ساڵ لە یەکەم هەڵبژاردنی کوردستان، ئەم گرەوەمان دۆڕاند و تائێستاش سەرکەوتوو نەبووین لەم کارەدا.

 

لەو پێنج مەرجە سەرەکییەی سیستمی لیبراڵ دیموکراسی بۆ حوکمڕانی کە لە سەرەوە دەستنیشانمان کردوون، ئێمە لە کوردستان هیچ مەرجێکمان جێبەجێنەکردووە و نازانین چۆن پێناسەی ئەو سیستمە حوکمڕانییە بکەین کە لە هەرێمی کوردستان پەیڕەو دەکرێت و نازانین چۆن پۆلێنی بکەین. خەڵکی کوردستان هەستیان بە پێویستی بەرەی ئۆپۆزیسیۆن کردبوو لە پەرلەمانی کوردستان، هەر بۆیە دەنگیان بە بزووتنەوەی گۆڕان دا تاوەکو ببێتە هەوێنی دامەزراندنی ئۆپۆزیسیۆنێکی بەهێز لە پەرلەمان، بەڵام بەداخەوە ئەم بزووتنەوەیە و ئەندامەکانیان نەیانتوانی بەردەوام بن و ئەم ئەمانەت و متمانەیەیان نەپاراست و میللەتیش تاوەکو ئەمڕۆ باجی ئەم هەڵە کوشندەیەی نوێنەرانی بزووتنەوەی گۆڕان دەدەن و رەنگە دەنگدەریش جارێکی دیکە بەو ئاسانییە متمانە بە پارت و لایەنێک نەکەن کە بەڵێنی گەورە بەخەڵک دەدات و دواتریش نوێنەرەکانیان لە پەرلەمان سەنگەر بگۆڕن و دەنگی خەڵکی ناڕازی بۆ پۆست بەکاربێنن.

 

هاوکێشەکە زۆر ئاسانە و لێکدانەوەی ناوێت، دەبێت پارتێک یان چەند پارتێک حوکمڕان بن و ئەوانەی دیکەیش ببنە ئۆپۆزیسیۆن و، کاری سەرەکیی ئۆپۆزیسیۆنیش بریتییە لە وردبوونەوە لە سەرجەم کار و پڕۆژەکانی حکومەت دوور لە موزایەدەی سیاسی. جیاوازییەکی زۆر هەیە لەنێوان وردبینی، یان وردبوونەوە لەگەڵ رەخنەگرتن (کە کارێکی رەوا و پێویستە).

 

ئۆپۆزیسیۆن لەنێو پەرلەمان دا گرنگترین رۆڵی هەیە، ئەویش چاودێرکردنی حکومەت و ئاشکراکردنی راستییەکانە بۆ رای گشتی و، پەردە هەڵدانەوەیە لەسەر کاری گەندەڵی و سەرپێچیکردنی یاساکان. ئێمە هەموومان بەرپرسیارین لە بەرهەمهێنانی ئەم مۆدێلە ناتەواوەی حوکمڕانی لە هەرێمی کوردستان دا، بەڵام ئەم بەرپرسیارێتییە بە پلەی یەکەم دەکەوێتە ئەستۆی پارتی دیموکراتی کوردستان و یەکێتیی نیشتمانیی کوردستان و سەرجەم ئەو پارتانەی بە هاوبەشی ئەم هەرێمەیان بەڕێوەبردووە و بەشداربوون لە حوکمڕانی هەرێمی کوردستان دا لە راپەڕینی 1991ـەوە تاوەکو ئەمڕۆ. 

 

بزووتنەوەی گۆڕان توانی دەنگی خەڵکی ناڕازیی کوردستان کۆبکاتەوە و ژمارەیەکی بەرچاو ئەندامی هەبێت لە پەرلەمانی کوردستان، بەڵام نە بەرگەی گوشاری سەرکردە تەقلیدییەکانی خۆی گرت کە دەرچووی قوتابخانەی شاخ بوون، نە بەرگەی گوشارەکانی دەستەڵاتیشیان گرت. لەلایەکی دیکەشەوە هەندێک پارت و گرووپ لەژێر گوشاری ئەندام و لایەنگرانیان هەوڵیان دەدا وەک ئۆپۆزیسیۆن رەفتار بکەن لەکاتێدا بە کردار هاوبەشبوون لە حوکمڕانی و هەرگیزیش نەیانتوانی قەناعەت بە میللـەت بکەن بۆ بەدەستهێنانی متمانەیان، هەر بۆیە لە هەڵبژاردنەکان دا نەیانتوانی سنووری پاڵشتی ئەندام و لایەنگرە تەقلیدییەکانی خۆیان ببەزێنن.

 

 

شانشینی یەکگرتوو (بەریتانیا) بە سەرکردایەتیی وینستن چێرچڵ، سەرۆکی پارتی پارێزگاران گرنگترین رۆڵی هەبوو لە تێکشکاندنی ئەڵمانیای نازی بە سەرکردایەتیی ئەدۆڵف هیتلەر لە جەنگی دووەمی جیهان دا، بەڵام لە یەکەم هەڵبژاردنی دوای کۆتایی شەڕی جیهانیی دووەم لە هاوینی 1945 بەرامبەر پارتی کار بە سەرکردایەتیی کلێمەنت ئەتلی دۆڕاندی و پارتی کار سەرکردایەتیی وڵاتی کەوتە دەست و گەورەترین خزمەتی پێشکێشی گەلی بەریتانیا کرد، کە خزمەتی تەندروستیی نیشتمانی گەورەترینیانە و ئێستاش لە جیهان کەم وێنەیە و شانازی پێوە دەکەن، پارتی پارێزگارانیش سەرکردەیەکی تازەیان هەڵبژارد و بوونە ئۆپۆزیسیۆن. ئەمەش دەگەڕێتەوە بۆ هۆشیاریی گەلی بەریتانیا لە مامەڵەکردن لەگەڵ پارتە سیاسییەکان دا.

 

لەوێ، میللـەت پارتە سیاسییەکان بەکاردەهێنین بۆ خزمەتی گەل و وڵات، بەڵام لێرە پارتەکان هەموو شتێک دەکەنە قوربانیی خۆیان و دەست و پێوەندەکانیان. دامەزراندن و بەڕێوەچوونی هەرێمێک کە سیستمی لیبراڵ دیموکراسی پیادە بکات کارێکی ئاسان نییە، بەتایبەت کە ئەو هەرێمە چواردەور درابێت بە نەیار کە سیستمی تاکڕۆیی و نا دیموکراسی بۆ حوکمڕانی پیادە دەکەن بەڵام بۆ هەرێمی کوردستان رەنگە ئەمە باشترین سیستم بێت بەتایبەت کە مافە بنەڕەتییەکانی لە دەستووری عێراق دا نووسراوەتەوە و بە جۆرێک لە جۆرەکان بەشدارە لە بەڕێوەبردنی عێراق، بۆیە باشترە کە بەلانیکەم، وەک عێراق، هەر چوار ساڵ جارێک و لەکاتی خۆیدا هەڵبژاردنی پەرلەمان، سەرۆکی هەرێمی کوردستان و ئەنجوومەنی شارەوانییەکان ئەنجام بدرێت. عێراق بەهێزە و تاوەکو دێت بەهێزتر دەبێت، بۆیە دەبێت ئەم راستییە زۆر بەباشی لەبەر چاوبگرین و هەوڵبدەین باشترین رۆڵمان هەبێت لەم وڵاتەدا.

 

 

لە شانشینی یەکگرتوو (بەریتانیا)، پارتی کار بە سەرکردایەتی تۆنی بلێر لە هەڵبژاردنی 1997 گەروەترین سەرکەوتنی بەسەر پارتی پارێزگاران بە سەرکردایەتی جۆن مەیجەر دا تۆمارکرد، بەڵام لە هەڵبژادرنی 2010 دا پارتی پارێزگاران بە سەرکردایەتی دەیڤید کامیرۆن سەرکەوتنی بەسەر تۆمارکردەوە، هەرچەندە نەیتوانی بەتەنیا حکومەت پێکبێنێت، بۆیە بە ناچاری هاوپەیمانێتی لەگەڵ پارتی لیبراڵ دیموکراتەکان کرد کە 57 کورسییان هەبوو و حکومەتێکی هاوبەشیان پێکهێنا و پارتی کار بووە ئۆپۆزیسیۆن. لە هەڵبژاردنی 2015 دا پارتی پارێزگاران پێگەی خۆی بەهێزتر کرد و سەرکەوتێنێکی دیکەیان بەسەر پارتی کار دا تۆمارکرد، تاوەکو هەڵبژاردنی پێشوەختەی مانگی شەشی 2017. هەرچەندە پارتی پارێزگارن 13 کورسییان لەدەستدا، بەڵام هەر دیسان بردیانەوە. لە هەڵبژاردنی پێشوەختەی مانگی  12ـی 2019 دا، پارتی پارێزگارن سەرکەوتنێکی گەورەتریان بەسەر پارتی کاردا بە سەرکردایەتی جێرمی کۆربن ی چەپڕەو دا تۆمارکرد و  بۆ نزیکەی پێنج ساڵی دیکەش حوکمڕانیان کرد. دواجاریش لە 4-7-2024 پارتی کار بە سەرکردایەتی سێر کییە ستارمەر گەورەترین سەرکەوتنی بەسەر پارتی پارێزگاران دا تۆمارکرد، بە جۆرێک کە پارتی کار توانی 414 کورسی لە کۆی 650 کورسی بباتەوە و کۆتایی بە 14 ساڵ حوکمڕانی پارتی پارێزگاران بهێنێت، ئەم سووڕەش بەردەوام دەبێت و رەنگەی پێنج ساڵی دیکە ئاراستەی سیاسەت بە جۆرێکی دیکە بگۆڕێت لە بەریتانیا.

 

ئەو وانەیەی کە پێویستە فێری بین، ئەوەیە، کە دەبێت میللەت هەڵبژاردەی هەبێت، ئۆپۆزیسیۆنی راستەقینەی هەڵقوڵاوی داخوازی و ویستی خەڵک و خاوەن بەرنامەی تۆکمە و نەفەس درێژی هەبێت. ئەگەر خەڵکی هەرێمی کوردستان بیانەوێت بەردەوام پشتیوانی رۆژئاوا مسۆگەر بکەن و لە هاوکێشە جیهانی و هەرێمییەکان رۆڵیان بمێنێت، دەبێت لەم هەڵبژاردنەدا بە ژمارەیەکی زۆر و بە گڕوتین، ئومێد بە ئایندەیەکی باشتر بەشداری لەم هەڵبژاردنەدا بکەن و پارتە سیاسییەکانیش رێز لە ویستی دەنگدەر بگرن، براوە حکومەت پێکبهێنت و دۆڕاویش ببێتە ئۆپۆزیسیۆنێکی کارا و چالاک، پانتایی میدیا ئازادتر و فراونتر بکرێت و کار بکرێت بۆ سەربەخۆیی تەواوی سیستمی دادوەری.

 

بە حوکمی ئەوەی پارتی دیموکراتی کوردستان و یەکێتیی نیشتمانیی کوردستان رابردوو و رەگیان هەیە لەم هەرێمەدا، رەنگە بۆ ماوەیەکی دیکە بتوانن بەردەوامبن لە حوکمڕانیی پێکەوە، بەڵام ئەمە کاتییە و بە حوکمی پێویستی دەبێت یەکێکیان ببنە ئۆپۆزیسیۆن. لەم هەڵبژاردنەدا جگە لە پارتە تەقلیدی و سەرەکییەکان، چەندین پارت و گرووپی تازەش شەڕ لەسەر بردنەوەی سەت کورسییەکەی پەرلەمان دەکەن. نەوەی نوێ بە سەرکردایەتیی شاسوار عەبدولواحید هەر لە سەرەتای دامەزراندنییەوە لە شەش ساڵی رابردوودا تاوەکو ئەمڕۆ سەرەکیترین بزووتنەوەی ئۆپۆزیسیۆنە، ئەگەر بتوانێت هەمان ژمارەی کورسیی شەش ساڵ پێش ئێستا بهێنیتەوە ئەوا سەرکەوتنێکی گەورە تۆمار دەکات، هەر شتێک لەمە زیاتر بەدەستبێنێت بە دەستکەوتی زیاتر بۆ لیستی نەوەی نوێ تۆمار دەکرێت.

 

دووریش نییە سەرهەڵدانی دوو گرووپی تازەی عەلی حەمە ساڵح و لاهوور شێخ جەنگی، سەرەڕای بردنەوەی چەند کورسییەک، ببنە هۆکاری پەرتکردنی بەشێک لە دەنگەکانی ئۆپۆزیسیۆن. ئەمەش بە قازانجی پارتی دیموکراتی کوردستان و یەکێتیی نیشتمانیی کوردستان تەواو دەبێت، سەرەڕای ئەمەش رەنگە دەنگی سەرجەم حیزبەکانی دیکە (نەک ژمارەی کورسییەکانیان) لە دەنگی پارتی و یەکێتی زیاتر بێت لەم هەڵبژاردنە دا، ئەمەش رێگە خۆش دەکات لە چوار ساڵی داهاتوو و لە هەڵبژاردنی 2028 دا ئۆپۆزیسیۆن بتوانێت لە بەرەیەکدا سەرکەوتن بەدەست بهێنێت ئەگەر لەسەر بەرنامەیەکی هەڵبژاردنی هاوبەش رێککەون.

 

 

لە هەموو ئەو وڵاتانەی کە لە حوکمڕانی دا پەیڕەوی سیستمی لیبراڵ دیموکراسی دەکەن و چەند ساڵ جارێک هەڵبژاردن دەکەن، پارتە سیاسییەکان ژمارەیەکی دیاریکراو لە  ئەندام و لایانگری بەوەفایان هەیە کە هەمیشە دەنگ بەو پارتانە دەدەن، رێژەی ئەوانەی بۆ سەرجەم پارتەکان لەنێوانی 20 بۆ 30٪ دەبێت، بەڵام ئەوانەی هەمیشە هەڵبژاردنەکان یەکلایی دەکەنەوە ئەو کەسانەن کە لەسەر بنەمای سیاسەت و کردار و هەڵوێستی پارتەکان و ئاستی خزمەت دەنگ دەدەن، رێژەی ئەوانیش لەنێوان 20 بۆ 30٪ دەبێت. کەواتە رێژەی بەشداریی دەنگدەر ئەگەر لە 30٪ زیاتر بوو، ئەوا دەبێت چاوەڕوانی گۆڕانکاری بکەین.

 

لە کۆتاییدا، میللـەت پێویستی بە ئۆپۆزیسیۆنێکی خاوەن پرەنسیپ و متمانەیە کە بتوانێت رۆژانە لێپێچینەوە لەگەڵ حکومەت بکات و خەڵک ئامادە بکات بۆ هەڵبژاردنی داهاتوو و بێ ئومێدیان نەکات، نەوەک وەک ئەو جۆرە پارت و گرووپ و ئەو سیاسەتڤانانەی کە تەنیا خەمی خۆ دەوڵەمەندکردنیانە. دوور نییە لە ئایندەدا یەکێک لە دوو پارتە سەرەکییەکەی کوردستان، وەک پێویستییەکی مێژوویی ببنە ئۆپۆزیسیۆن. لە شەش ساڵی رابردوودا نەوەی نوێ لە ئۆپۆزیسیۆن دا بووە و چاوەڕوان دەکرێت دوای ئەم هەڵبژاردنەش لەسەر هەمان هەڵوێست بەردەوام بێت و بەهیوای ئەوەی کە بەرەی ئۆپۆزیسیۆن لە رێگەی پارتەکانی دیکە بەهێزتربێت ئەم جارە.

 

بۆ ئەنجامدانی گۆڕانکاری دەبێت سەرەتا ئەم مۆدیلە ناتەواوەی حوکمڕانی لە هەرێمی کوردستان دا کە بەرپرسە لە هەموو هەڵە و نەهامەتییەکانی 32 ساڵی رابردوو بگۆڕدرێت، دەبێت ئۆپۆزیسیۆنێکی بەهێز هەبێت لە خەمی میللەت دا بێت. هەوڵدراوە، بەڵام تاوەکو ئەمڕۆ گەلی کوردستان نەیتوانیوە ئۆپۆزیسیۆنێک بەرهەم بێنێت کە بەرگەی گوشارەکانی دەسەڵات بگرێت. ئەمەش خەم و ئەرکی هەمووانە، بۆیە باشترین رێگە بۆ ئەنجامدانی گۆڕانگاری راستەقینە لەم هەرێمەدا ئەوەیە، کە تەواوی دەنگدەران لە رۆژی دەنگدان، لە 20-10-2024 دەنگبدەن، بچن بە ویژدان و ئومێد بە ئایندەیەکی گەشتر دەنگبدەن بەو پارتەی کە متمانەی پێدەکەن. هیوادارم دەنگدانی ئەم جارە ببێتە خاڵی وەرچەرخان بۆ جیاکردنەوەی حکومەت لە ئۆپۆزیسیۆن و دواتریش قەدەخەکردنی بە ئەندامبوونی فەرمانبەرانی میری لە پارتە سیاسییەکان دا.

 

* بەختیار مام شێخ، 22 ساڵە ئەندامی پارتی کارە لە شانشینی یەکگرتوو(بەریتانیا). لە هەڵبژاردنە ناوخۆییەکانی ساڵانی 2014، 2018 و 2022 براوە بووە و ئەندامی شارەوانییە لە شارەوانیی شاهانەی کنزنگتن و چێڵسی. لەم ماوەیەدا ئەندامێتیی زۆربەی کۆمیتەکانی ئەنجوومەنی شارەوانی کردووە، جێگری پارێزگار بووە و هەروەها جێگری سەرۆکی ئۆپۆزیسیۆن و دواتریش سەرۆکی فراکسیۆنی ئۆپۆزیسیۆن بووە.