پەرلەمانتارێکی ئیی پارتی هەڕەشە لە پەروین بوڵدان دەکات

سەلچوک تورکئۆغڵو، پەرلەمانتاری ئیی پارتی لە بازنەی بورسا، لە تۆڕی کۆمەڵایەتیی ئێکس پەیامێکی تووندی ئاراستەی پەروین بوڵدان، پەرلەمانتاری دەم پارتی و بریکاری سەرۆکی پەرلەمان کرد و نووسیویەتی: "پەروین خانم تۆ دواکەسیش نیت کە بتوانیت قسە لەسەر هاندەرانی گەورەی بورساسپۆر بکەیت."

پەرلەمانتارەکەی ئیی پارتی هێرش دەکاتە سەر بوڵدان و دەڵێت: "با جنێو و سووکایەتی نەبێت، زۆرباشە، بەڵام ئایا تۆ ئەمە دەڵێیت؛ کە هەموو رۆژێک ستایشی بکوژی ساوایان لە ئیمراڵی [عەبدوڵڵا ئۆجەلان] دەکەیت و واز لە سووکایەتیکردن بە کۆماری تورکیا و گەلی تورک ناهێنیت؟"

سەلچوک تورکئۆغڵو لە پەیامەکەیدا کە بە "ئامۆژگارییەکی بچووک" ناوی دەبات، هەڕەشە دەکات و دەڵێت: "تۆ کە بە خەیاڵی خۆت رایدەگەیەنیت نیشتمانی هەزار ساڵەی تورک و کورد دابەش دەکەیت، ئەم قسەیە دەکەیت؟ بەبێ ئەوەی دروشمە جوداخوازەکانی نێو یاریگەی ئامەد شەرمەزار بکەیت، هەرگیز جورئەت نەکەیت زمانی ژەهراویت بەرامبەر بورساسپۆر بەکاربهێنیتەوە."

رۆژی چوارشەممە 17-12-2025، پەروین بوڵدان لە ئێکس وێنەی هەواڵێکی بڵاوکردەوە کە باسی لە سووکایەتیکردنی هاندەرانی بورساسپۆر بە لەیلا زانا، سیاسەتڤانی کورد دەکرد و نووسیبووی: "نە بە جنێودان و سووکایەتی پارێزگاری لە تۆپی پێدەکرێت و نە لە بەهاکان. ئێمە ئەم زمانە دژی لەیلا زانا رەتدەکەینەوە."

بوڵدان هەروەها نووسیبووی: "وەرزش دەبێت رێز بەرهەم بهێنێت، نەک دوژمنایەتی. کەرامەتی مرۆڤ لە سەرووی هەموو شتێکەوەیە."

رۆژی سێشەممە 16-12-2025، لە کاتی یاریی نێوان یانەی سۆماسپۆر و بورساسپۆر، گرووپێک لە هاندەرانی یانەی بورساسپۆر دروشمی سووکایەتیئامێزیان دژی لەیلا زانا گوتەوە.

ئەم رووداوە کاردانەوەی زۆری لێکەوتەوە و بەشێکی زۆر لە پەرلەمانتارانی فراکسیۆنە جیاوازەکان (دەم پارتی، ئاکپارتی، جەهەپە، هوداپار، پارتی سەعادەت و پارتی دەڤا) سەرکۆنەی ئەو رەفتارەیان کرد.