رووداو دیجیتاڵ
وەزیری ناوخۆی تورکیا رایگەیاند، لە ماوەی یەک مانگدا 4040 کۆچبەری نایاسایی لە تورکیا و باکووری کوردستان دەستگیر کراون و سەرجەمیشیان دیپۆرت دەکرێنەوە.
عەلی یەرلیکایا، سێشەممە 8ی تشرینی یەکەم لە تۆڕی کۆمەڵایەتیی ئێکس رایگەیاند، لەو ئۆپەراسیۆنانەدا کە لە ماوەی یەک مانگدا لە سەرتاسەری تورکیا کراون، 200 کەس بە تۆمەتی قاچاخچێتی کردن بە کۆچبەران و 4040 کۆچبەری نایاسایی دەستبەسەر کراون.
بە گوتەی یەرلیکایا، ئۆپەراسیۆنەکان بە هاوئاهەنگیی داواکارانی گشتی و سەرۆکایەتیی فەرمانگەی بەرەنگاربوونەوەی قاچاخچێتی بە کۆچبەران و بازرگانی بە مرۆڤ کە سەر بە فەرماندەیی گشتیی جەندرمەن، کراون.
تیمەکان دەستیان گرتووە بەسەر 107 ئۆتۆمبێلدا کە بۆ بەقاچاخبردنی کۆچبەران بەکارهێندراون، هەروەها لەو 200 کەسەی کە بە تۆمەتی قاچاخچێتی بە کۆچبەران دەستبەسەر کراون، 82 کەسیان بە بڕیاری دادگە خراونەتە زیندانەوە و 31 کەسیان بە مەرجی دادوەری ئازاد کراون. لیکۆڵینەوە لەبارەی 87 تۆمەتبارەکەی دیکە بەردەوامە.
چوار هەزار و 40 کۆچبەرە دەستبەسەرکراوەکان رادەستی فەرمانگەی کۆچی پارێزگاکان کراون و دەستبەجێ رێکارەکان بۆ دیپۆرتکردنەوەیان دەستیپێکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ