رووداو دیجیتاڵ
پلاتفۆڕمی (کوشتنی ژنان دەوەستێنین) رایگەیاند، مانگی رابردوو 32 ژن لەلایەن پیاوانەوە کوژراون و 26 ژنیش بەشێوەی گوماناوی گیانیان لەدەستداوە.
پلاتفۆڕمی (کوشتنی ژنان دەوەستێنین)، رۆژی چوارشەممە، 04-12-2024، راپۆرتی مانگی تشرینی دووەمی ئەم ساڵی لەبارەی کوشتنی ژنان بڵاوکردەوە.
بە گوێرەی پلاتفۆڕمەکە، لە مانگی تشرینی دووەمی ئەم ساڵ، لە تورکیا و باکووری کوردستان 32 لەلایەن پیاوانەوە کوژراون و 26 ژنیش بەشێوەی گوماناوی گیانیان لەدەستاوە.
پلاتفۆرمەکە دەڵێت، هۆکاری کوشتنی حەوت لەو ژنانە، بەهۆی داوای جیابوونەوە، رەتکردنەوەی پێکهێنانی ژیانی هاوژینی و دروستکردنی پەیوەندییەوە بووە.
هەر بە گوێرەی پلاتفۆرمەکە، یەکێکیان بەهۆی داواکردنی پارە، یەکێکی دیکەش بەهۆی ئەوەی شایەتی کوژرانی ژنێک بووە، هۆکاری کوشتنی 23 کوژراوەکەی دیکەش نەزاندراوە.
"17 لەو ژنانە لەلایەن هاوژینەکانیان، پێنجیان لەلایەن خۆشەویستەکانیان، دوویان لەلایەن خۆشەویستی پێشوویان، دوویان لەلایەن خزمەکانیان، یەکێکیان لەلایەن نەناسراوێکەوە، کوژراوە." لە راپۆرتی پلاتفۆڕمەکەدا هاتووە.
بە گوێرەی ئامارەکانی پلاتفۆڕمی (کوشتنی ژنان دەوەستێنین)، لە 11 مانگی ئەم ساڵدا 375 ژن لەلایەن پیاوانەوە کوژراون و 233 ژنیش بەشێوەی گوماناوی گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ