رووداو دیجیتاڵ
پیاوێکی تەمەن 70 ساڵ لە ئیستەنبووڵ، بە چەک هاوژین و کچەکەی کوشت و دواتریش بە هەمان چەک کۆتایی بە ژیانی خۆیشی هێنا.
رووداوەکە ئەمڕۆ سێشەممە 1ی نیسانی 2025 لە گەڕەکی جەبەجی لە شارۆچکەی سوڵتانگازی لە ئیستەنبووڵ روویدا.
دوای ئەوەی هاووڵاتییان دەنگی تەقەیان لە ماڵێکدا بیست، هەواڵیان بە لایەنی پەیوەندیدار دا؛ دواتریش تیمەکانی تەندروستی و پۆلیس گەیشتنە شوێنی رووداوەکە.
بەگوێرەی لێکۆڵینەوەی تیمەکانی پۆلیس، پیاوەکە تەمەنی 70 ساڵ بووە و نەخۆشیی دەروونی هەبووە، بە چەکێکی جۆری تاپڕ هاوژینەکەی کە 67 ساڵ و کچەکەی کە 46 ساڵ بووە، کوشتووە و دواتریش بە هەمان چەک کۆتایی بە ژیانی خۆی هێناوە.
تیمەکان تەرمی هەر سێ کەسەکەیان رەوانەی دادپزیشکیی پارێزگەکە کرد و دواتریش پۆلیس رێکاری ئەمنی گرتەبەر.
بەگوێرەی ئاماری نافەرمی، پار لە تورکیا و باکووری کوردستان سێ هەزار و 801 رووداوی تووندوتیژی تۆمارکراون و تێیاندا دوو هەزار و 370 کەس کوژراون و سێ هەزار و 829ـی دیکەش بریندار بوون.
