رووداو دیجیتاڵ
ئەمڕۆ دووشەممە، محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق، سەردانێکی مەیدانیی بۆ دۆڵی حۆران و بیابانی ئەنبار لە چوارچێوەی ئۆپەراسیۆنەکانی ئەنبار و جەزیرەدا کرد.
لە سەردانەکەدا ژمارەیەک بەرپرسی باڵای سەربازی و حکومی یاوەرییان کرد، لەوانەش وەزیری بەرگری، سوپاسالار، جێگری فەرماندەی ئۆپەراسیۆنە هاوبەشەکان و ژمارەیەک فەرماندەی دیکە.
بەگوێرەی راگەیێندراوێکی نووسینگەی سەرۆکوەزیرانی عێراق، سوودانی بە شێوەیەکی مەیدانی و لە رێگەی ئاسمانییەوە، سەردانی هێزەکانی لە ناوچەکانی دۆڵی حۆران، سەقار، حوسەینیات، حوزەیمی، کەعرە و عەکاز کردووە. گوێی لە روونکردنەوەی وردی فەرماندەکان گرت سەبارەت بە کارە بەردەوامەکان بۆ دروستکردنی هێڵی بەرگری لە دۆڵی حۆران و دانانی بنکەی سەربازی لە ماوەی ئەم کابینەیەدا.
دۆڵی حۆران دەکەوێتە سنووری قەزای روتبە، بە دووریی 311 کیلۆمەتر لە روومادیی ناوەندی پارێزگای ئەنبار. بەهۆی سرووشتی ناوچەکە و هەڵکەوتەی جوگرافیی لە قووڵایی بیابان و دووریی لە ئاوەدانی، لە ساڵی 2003ـەوە یەکێک بووە لە مۆڵگە سەرەکییەکانی گرووپە چەکدارەکان. لە حوزەیرانی 2014، داعش لە دۆڵی حۆرانەوە هێرشی کردە سەر شارۆچکەی روتبە و داگیری کرد.
سوودانی لە سەردانەکەیدا چاودێریی چەند قەڵا و خاڵێکی قاییمکراوی کرد لە سنووری فیرقەکانی پێنجەم و حەوتەمی سوپا، لەوانەش بارەگای لیوای 20ـی فیرقەی پێنجەم لە فەرماندەیی ئۆپەراسیۆنەکانی ئەنبار لە ناوچەکانی سەقار و حوزەیمی، هەروەها خاڵی سنووریی نێوان فەرماندەیی ئۆپەراسیۆنەکانی ئەنبار و جەزیرە لە دەروازەی دۆڵی حۆران، کە دەکەوێتە ژێر بەرپرسیارێتیی فەوجی دووەمی لیوای 78ـی فیرقەی حەوتەم.
رۆژی 2ـی ئەم مانگە و دوای زیاتر لە 20 ساڵ، سوپای عێراق کۆنترۆڵکردنی تەواوەتیی دۆڵی حۆرانی راگەیاند.
فەرماندەی گشتیی هێزە چەکدارەکان لەگەڵ سەربازانی هێڵی بەرگری کۆبووەوە و لە رەوشیانی پرسی. جەختی لە پێویستیی دابینکردنی هەموو پێداویستییەکانیان کردەوە بۆ ئەوەی بتوانن بە باشترین شێوە ئەرکەکانیان جێبەجێ بکەن. هەروەها گرنگیی ستراتیژیی ئەو ناوچەیەی بۆ ئاسایش و سەقامگیریی وڵات، لەگەڵ گرنگییە ئابوورییە گەورەکەیدا، دووپاتکردەوە.
سەردانەکەی سوودانی، چاودێریکردنی ئاسمانیی کارەکانی ئەو کۆمپانیا نەوتییانەشی گرتەوە کە ئەرکی بەرهەمهێنانی نەوت و گازیان لە کێڵگەی عەکاز لەئەستۆیە.
دۆڵی حۆران بە درێژایی 370 کیلۆمەتر، لە باکووری سەرسارەوە تاوەکو سنووری عێراق و سعودیە درێژدەبێتەوە. دوای کۆنترۆڵکردنەوەی، هێزە عێراقییەکان هێڵێکی بەرگرییان تێدا دروستکردووە و هێزەکانی فیرقەی پێنج، فەرماندەیی ئۆپەراسیۆنەکانی جەزیرە و فەرماندەیی ئۆپەراسیۆنەکانی ئەنباری لێ جێگیر کراوە.
