رووداو دیجیتاڵ
دەزگای دژەتیرۆری عێراق رایگەیاند، بە هاوکاری دەزگای دژەتیرۆری سلێمانی، کەسێکیان دەستگیرکردووە، کە "دادوەری یاسایی"ی داعش بووە.
رۆژی چوارشەممە 28-6-2023، دەزگای دژەتیرۆری عێراق دەستگیرکردنی کەسێکی راگەیاند، کە بەپێی دەزگاکە "دادوەری یاسایی"ی داعش بووە.
هەرچەند ئاماژە بەوە نەدراوە ئەو کەسە لە کوێ دەستگیرکراوە، بەڵام دژەتیرۆر باسی لەوەکردووە ئۆپەراسیۆنی دەستگیرکردنی ئەو سەرکردەیەی داعش بە هاوئاهەنگی لەگەڵ فەوجی دەزگای دژەتیرۆری سلێمانی بووە.
دەزگای دژەتیرۆری عێراق وێنەی ئۆپەراسیۆنی گرتنی ئەو کەسەی بڵاوکردووەتەوە، لە ئۆپەراسیۆنەکەدا ژمارەیەک لە ئەندامانی دژەتیرۆری عێراق و دژەتیرۆری سلێمانی پێکەوە لە ناوچەیەکی پڕ لە سەوزایی دەردەکەون. دواتر ئەو کەسە لە نێو خانوویەکدا دەستگیر دەکەن و کەلەپچەی دەکەن، هەر لە نێو خانووەکەدا دەست بەسەر چەکێک و سێ ئامێری مۆبایل و چەقۆیەکدا دەگرن.
هەر لە گرتە ڤیدیۆیەکەدا چەند وێنەیەکی ئەو کەسە دانراون، لەو کاتەی لە ریزەکانی داعشدا بووە و لەگەڵ ژمارەیەک لە چەکدارانی داعشدا دەردەکەوێت.
