رووداو دیجیتاڵ
لیژنەی لێکۆڵینەوەی پەرلەمانیی تایبەت بە سەرپێچییەکانی حکومەتی خۆجێیی بەسرە، داوا دەکات ئەسعەد عیدانی، پارێزگاری بەسرە لە پۆستەکەی دووربخرێتەوە و دادگایی بکرێت.
سعود ساعدی، سەرۆکی لیژنەی لێکۆڵینەوەی پەرلەمانیی تایبەت بە سەرپێچییەکانی حکومەتی خۆجێیی بەسرە لە راگەیێندراوێکدا دەڵێت، "بەهۆی بوونی سەرپێچی و چەند هۆکارێکی دیکەی پەیوەست بە هەبوونی گومان لە پرۆژەکاندا، راسپاردەمان کردووە بە دوورخستنەوەی پارێزگاری بەسرە و رەوانەکردنی بۆ دادگا تایبەتمەندەکان."
لیژنە پەرلەمانییەکە بەپێی فەرمانی پەرلەمانی ژمارە 87 پێکهێندراوە.
بە گوتەی سعود ساعدی، کە هاوکات سەرۆکی فراکسیۆنی حقوقە لە پەرلەمانی عێراق، "ئەمە یەکەمین راسپاردەی لیژنەی لێکۆڵینەوەی پەرلەمانییە بۆ لێکۆڵینەوە لە سەرپێچییەکانی حکومەتی خۆجێی بەسرە."
فراکسیۆنی حقوق باڵی سەر بە کەتائیب حزبوڵڵای عێراقییە.
پێشتریش ئەمیر مەعموری پەرلەمانتاری سەربەخۆ، رەخنەی لە پرۆسەی لابردنی خانوو و زێدەڕۆییەکان لە بەسڕە گرتبوو، حکومەتی خۆجێی پارێزگاکەی بە بەرپرسیار زانیبوو.
