دانیێل هەگاری، گوتەبێژی سوپای ئیسرائیل رایگەیاند، زۆربەی مووشەکەکانی ئێرانیان بەرپەرچداوەتەوە کە زیاتر لە 200 درۆن و مووشەک بوون. هەروەها دەڵێت، "زیانێکی کەم بەر بنکەیەکی سەربازیمان کەوتووە."

 

بەو پێیەبێت، تائێستا هێرشەکانی ئێران دوو زیانیان لێکەوتووەتەوە بۆ ئیسرائیل، زیانگەیاندن بەو بنکەیە و برینداربوونی کچێکی 10 ساڵان. 

 

بنکەکە دەکەوێتە باشووری ئیسرائیل، بیابانی ناگڤ، نزیک شارۆچکەی ئەراد. 

 

لەلایەکی دیکەوە میدیای فەرمیی ئێران دەڵیت، هێرشەکەیان گورزێکی قورسی لە بنکەیەکی ئاسمانیی بیابانی نەقەب داوە.

 

بەرپرسێکی ئێرانی بە میدیای وڵاتەکەی راگەیاندووە: "گرنگترین بنکەی ئاسمانیی ئیسرائیلی لە نەقەب، بە سەرکەوتوویی بووە ئامانجی مووشەکی خەیبەر. وێنە و داتاکان پێشانیدەدەن کە بنکەکە گورزێکی سەختی بەرکەوتووە."

 

جۆ بایدن، سەرۆکی ئەمریکا لەسەر هێرشەکە بە تەلەفۆن قسەی لەگەڵ بنیامین نەتەنیاهوو، سەرۆکوەزیرانی ئیسرائیل کرد و میدیای ئیسرائیلیش دەڵێت، کابینەی جەنگی خوێندنەوە بۆ وەڵامدانەوەی هێرشەکەی ئیسرائیل دەکات. 

 

هاوکات، ئێران دەڵێت، دوودڵ نابێت لە بەرگری لەخۆکردن ئەگەر هێرشی بکرێتە سەر. 

 

ئەنتۆنیۆ گۆتێرێز، سکرتێری گشتیی نەتەوە یەکگرتووەکانیش لە راگەیێندراوێکدا ئاماژەی بەوەکرد، سەرکۆنەی ئەم هەڵچوونە مەترسیدارە دەکەم کە خۆی لە هێرشی گەورەی ئێران بۆ سەر ئیسرائیلدا دەبینێتەوە و داوای وەستاندنی دەستبەجێی ئەم دووژمنکارییانە دەکەم. 

 

گۆتێرێز دەڵێت، نە ناوچەکە و نە جیهانیش بەرگەی جەنگێکی دیکە ناگرن. 

 

 

سوپای پاسداران هۆشدارییەکی تووند دەداتە ئەمریکا و دەڵێت، "هەر جۆرە پشتیوانی و بەشداریکردنێک لە زیانگەیاندن بە بەرژەوەندییەکانی ئێران، وەڵامدانەوەی یەکلاکەرەوە و پەشیمانکەرەوەی هێزە چەکدارەکانی کۆماری ئیسلامی ئێرانی بەدواوە دێت". هەروەها هۆشداری دەداتە وڵاتانی دراوسێ و ناوچەکەش و دەڵێت: "ئەگەر لە هەر کام لەو وڵاتانەوە هەر هەڕەشەیەک رووبدات، ئێران وەڵامێکی گونجاوی بۆ دەبێت." 

 

سوپای پاسدارانی ئێران لەبارەی هێرشە مووشەکی و درۆنییەکانی بۆ سەر ئیسرائیل راگەیێندراوی دووەمی بڵاوکردەوە.

 

سوپای پاسدارانی ئێران لە دووەمین راگەیێندراویدا رایگەیاندووە، "دوای زیاتر لە 10 رۆژ بێدەنگی و پشتگوێخستنی رێکخراوە نێودەوڵەتییەکان و بەتایبەتیش ئەنجوومەنی ئاسایشی نەتەوە یەکگرتووەکان بۆ شەرمەزارکردنی دەستدرێژی و تاوانکاریی رژێمی زایۆنی لە هێرشکردنە سەر بەشی کۆنسوڵخانەی باڵیۆزخانەی کۆماری ئیسلامی ئێران لە دیمەشق وەک بەشێک لە خاکی وڵاتمان و شەهیدکردنی 7 کەس لە راوێژکارە یاساییەکانی وڵات و سزانەدانی رژێمی تاوانکار، بەپێی بڕگەی حەوتەمی جاڕنامەی نەتەوە یەکگرتووەکان؛ گیانبەخشەکانی (سەرباز) سوپای پاسدارانی شۆڕشی ئیسلامی لە وەڵامی ئەو تاوانانە و جێبەجێکردنی هۆشدارییەکانی پێشوو و دەستەبەرکردنی داواکارییە رەواکانی ئێران و بە مەبەستی سزادانی دەستدرێژکار، بە کەڵک وەرگرتن لە توانا ستراتیژییەکانی هەواڵگری، مووشەکی و درۆنییەکانی، هێرشی کردە سەر ئامانجە سەربازییە گرینگەکانی سوپای تیرۆریستی زایۆنی لە ناوچە داگیرکراوەکاندا و بە سەرکەوتوویی ئەو ئامانجانەی پێکا و لەناوی بردن."

 

سوپای پاسداران هۆشداری دەداتە ئەمریکا لە ئەگەری پشتگیریکردنی لە ئیسرائیل و زیانگەیاند بە بەرژەوەندییەکانی ئێران و دەڵێت: "هۆشداری دەدرێتە حکومەتی تیرۆریستی ئەمریکا کە هەر جۆرە پشتیوانی و بەشداریکردنێک لە زیانگەیاندن بە بەرژەوەندییەکانی ئێران، وەڵامدانەوەی یەکلاکەرەوە و پەشیمانکەرەوەی هێزە چەکدارەکانی کۆماری ئیسلامی ئێرانی بەدواوە دێت، هەروەها ئه مریکا بەرپرسە له کردەوە خراپه کانی رژێمی زایۆنی و ئەگەر ئەم رژێمه منداڵکوژە له ناوچەکەدا کۆنتڕۆڵ نەکرێت، دەبێت لێکەوتەکانی قبووڵ بکات."

 

لە راگەیێندراوەکەدا هەروەها ئاماژە بەوە کراوە کە ئێران پابەندە بە سیاسەتی دراوسێیەتی باش لەگەڵ وڵاتانی ناوچەکە و هەموو دراوسێکانی، بەڵام ئەگەر لە هەر کام لەو وڵاتانەوە هەر هەڕەشەیەک رووبدات، "ئێران وەڵامێکی گونجاوی بۆ دەبێت."

 

سوپای پاسداران لەوبارەیەوە دەڵێت: "وێڕای جەختکردنەوە لەسەر سیاسەتی دراوسێیەتی باش لەگەڵ وڵاتانی دراوسێ و وڵاتانی ناوچەکە، رادەگەیێندرێت کە لە هەر وڵاتێکەوە هەر هەڕەشەیەک لەلایەن دەوڵەتی تیرۆریستی ئەمریکا و رژێمی زایۆنی هەبێت، رووبەڕووی وەڵامێکی گونجاوی کۆماری ئیسلامی ئێران دەبێت."

 

لە راگەیێندراوەکەیدا سوپای پاسدران دەڵێت: "نەتەوەی قارەمانی ئێران دڵنیا دەکەینەوە کە سوپای پاسدارانی شۆڕشی ئیسلامی و هێزە چەکدارەکانی دیکەی وڵات، لە پێناو بەرگری لە بەرژەوەندییە نەتەوەییەکان تا مەرگ دەوەستن و هەوڵی دوژمنان بۆ تێکدانی ئاسایش و ئارامی خەڵک تێکدەشکێنن."

 

سوپای پاسدارانی ئێران بەرەبەیانی ئەمڕۆ یەکشەممە 14ی نیسانی 2024 لە یەکەمین راگەیێندراویدا رایگەیاند، بە ئاراستەکردنی دەیان مووشەک و فڕۆکەی بێفڕۆکەوان، هێرشیان بۆسەر ئیسرائیل دەستیپێکرد و ئاماژەوە بەوە کرد کە ئاراستەکردنی ئەو مووشەک و درۆنانە وەڵامێکە بۆ هێرشکردنە سەر کۆنسوڵخانەی ئێران لە دیمەشق لە لایەن ئیسرائیلەوە.

 

 

 

 

 

 

 

سوپای ئیسرائیل رایدەگەیێنێت، لە کۆمەڵگەکانی نزیک سنووری لوبنان زەنگی ئاگادارکردنەوە لێدراوە. بەرپرسێکی سەربازیی ئیسرائیلیش رایگەیاندووە، ئێران زیاتر لە 100 درۆنی هاویشتووە. 

 

محەممەد رەزا ئاشتییانی، وەزیری بەرگریی ئێران رایدەگەیێنێت، بە تووندی وەڵامی هەر وڵاتێک دەدەینەوە کە ئاسمانەکەی بۆ ئیسرائیل بکاتەوە تاوەکو هێرشبکاتە سەرمان. 

 

ئاژانسی هەواڵی میهر ئەو لێدوانەی وەزیری بەرگریی وڵاتەکەی بڵاوکردووەتەوە. 

 

 

سوپای پاسداران پشتڕاستیدەکاتەوە کە هێرشیان بۆ سەر ئیسرائیل بە چەندین فرۆکەی بێ فرۆکەوان و مووشەک کرووز ئەنجامداوە.

 

لە راگەیەندراوێکدا سوپای پاسداران دەڵێت هێرشەکە "وەڵامێک بوو بۆ تاوانەکانی قەوارەی زایۆنی."

 

ئەمشەو 13ی نیسان ئێران هێرشێکی بەرفراوانی بە درۆن و مووشەک بۆ سەر ئیسرائیل دەستپێکرد و بەگوێرەی میدیای ئیسرائیلی، ئەگەر شکست بە هێرشەکە نەهێندرێت ئەوا چاوەڕواندەکرێت کاژێر 02:00ـی شەو بگەنە ئاسمانی ئیسرائیل.

 

ئیسرائیل دەڵێت، لەڕووی بەرگری و هێرشبردن ئامادەن و جەختیش دەکاتەوە کە سیستمی بەرگری ئیسرائیل ئامادەیە بۆ بەرپەرچدانەوەی هێرشەکانی ئێران.

 

ئەدریێن واتسن، گوتەبێژی ئەنجوومەنی ئاسایشی نیشتمانیی ئەمریکا دەڵێت، تیمی ئاسایشی نیشتمانی بەردەوام زانیاری بە سەرۆک بایدن دەدەن و چاوەڕوان دەکرێت هێرشەکە چەند کاژێرێک بخایێنێت. 

 

ئەدریێن واتسن دەشڵێت، ئەمریکا پشتگیریی خەڵکی ئیسرائیل دەکات و لە بەرگریکردن دژی ئەم هەڕەشانەی ئێران پشتیوانییان دەکات. 

 

دوای ئەوەی وەزارەتی گواستنەوەی عێراق بڕياریدا گەشتە ئاسمانییەکان رابگرێت، هەردوو فڕۆکەخانەکانی هەولێر و سلێمانیش داخران.

 

هەندرێن موفتی، بەڕێوەبەری فڕۆکەخانەی نێودەوڵەتیی سلێمانی بە تۆڕی میدیایی رووداوی راگەیاند، بە فەرمانی وەزارەتی گواستنەوەی عێراق، هەموو گەشتە ئاسمانییەکانمان بۆ کاتێکی نادیار راگرتووە.

 

هەندرێن موفتی گوتی: ئەم بڕیارە لەلایەن وەزارەتی گواستنەوەی عێراقەوە دەرکراوە بۆ پاراستنی گیانی گەشتیاران و بەشێوەیەکی کاتیشە.

 

بەپێی زانیارییەکانی تۆڕی میدیایی رووداو، فڕۆکەخانەی نێودەوڵەتی هەولێریش هەمان بڕیاری وەزارەتی گواستنەوەی عێراقی جێبەجێکردووە و گەشتەکانی بەشێوەی کاتیی راگرتووە.