رووداو دیجیتاڵ
هەردوو حکومەتى عێراق و چیک، لە براگ رێککەوتنێک و پێنج لێکتێگەیشتن واژۆ دەکەن کە تایبەتن بە کەرتى فڕۆکەوانى، نەوت، بازرگانى و پیشەسازى.
ئەمڕۆ پێنجشەممە محەممەد شیاع سوودانى، سەرۆکوەزیرانی عێراق بە سەرۆکایەتى شاندێک گەیشتە براگ و لەگەڵ پیتەر فیالا، سەرۆکوەزیرانى چیک ئەو رێککەوتنە و لێکتێگەیشتنانەی واژۆ کردن.
بە گوێرەى نووسینگەى سەرۆکوەزیرانى عێراق، ئەو رێککەوتنەى واژۆ کراوە، بۆ بوارى گواستنەوەى ئاسمانى بووە لە نێوان هەردوو دەسەڵاتى فڕۆکەوانى عێراق و چیک.
یەکێک لە یاداشتى لێکتێگەیشتنەکان لە نێوان وەزارەتەکانى نەوتى عێراق و وەزارەتى پیشەسازی و بازرگانی چیک واژۆ کراون، یەکێکی دیکە لە نێوان وەزارەتى ناوخۆى هەردووڵات، یەکێکى دیکەیان لە نێوان یەکێتى پیشەسازیى هەردوولا واژۆ کراون و یەکێتیى ژورە بازرگانییەکانى عێراق و چیک و وەزارەتى ژینگەى هەردوولا دوو یاداشتى لێکتێگەیشتنى دیکەیان واژۆ کرد.
بڕیارە لەو سەردانەیدا بۆ چیک، سوودانى لەگەڵ نوێنەرى کۆمپانیا چیکییەکان و رەوەندى عێراقى لەو وڵاتە کۆببێتەوە.