رووداو دیجیتاڵ
ئەندامێکی ئەنجوومەنی کۆمیسیاران رایدەگەیێنێت، ئەنجوومەنی کۆمیسیاران ئێوارەی ئەمڕۆ ئەنجامی بەرایی هەڵبژاردن رادەگەیێنێت.
عەباس فەتلاوی، ئەندامی ئەنجوومەنی کۆمیسیارانی کۆمیسیۆنی باڵای سەربەخۆی هەڵبژاردنی عێراق، ئەمڕۆ چوارشەممە 12-11-2025 بە زیاد ئیسماعیل، پەیامنێری تۆڕی میدیایی رووداوی گوت، بەگوێرەی یاسا، دوای 24 کاژێر لە دەنگدانی گشتی و داخستنی سندووقەکانی دەنگدان، ئەنجامەکانی هەڵبژاردن رادەگەیێندرێت.
ئەندامەکەی ئەنجوومەنی کۆمیسیاران باسی دەنگی پووچەڵی کرد و ئاماژەی بەوە کرد، ئاماری دەنگی پووچەڵ تاوەکو ئێستا بە تەواوی روون نەبووەتەوە، دوای گەیشتنی دەنگی هەموو وێستگەکان و هاوتاکردنیان، دەردەکەوێت.
فەتلاوی گوتیشی، "سکاڵا زۆر کەمن بەراورد بە پرۆسەی هەڵبژاردن. رێژەی بەشداری هەڵبژاردن کە بڵاوکراوەتەوە راست و دروستە، لەسەر بنەمای ئەو ئامارە ئەلیکترۆنییانە بووە، کە ئامێرەکان دەریان کردوون."
هەر ئەمڕۆ جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق رایگەیاند، "39 سکاڵا لە دەنگدانی گشتی و تایبەت تۆمار کراون."
رۆژی سێشەممە دەنگدانی گشتی بۆ خولی شەشەمی پەرلەمانی عێراق بەڕێوەچوو، بەپێی ئاماری کۆمیسیۆن لە کۆی زیاتر لە 20 ملیۆن دەنگدەر، 12 ملیۆن و 3 هەزار و 143 دەنگدەر دەنگیان داوە.
