رووداو دیجیتاڵ
باڵیۆزی ئەمریکا لە عێراق دەڵێت، ئەمریکا پاڵپشتی لە هاوئاهەنگیی نێوان پارتی و یەكێتی دەکات لەسەر ئەو کێشانەی رووبەڕووی هەرێمی کوردستان و عێراق دەبنەوە.
رۆژی پێنجشەممە، 8ـی حوزەیرانی 2023، ئەلینا رۆمانۆوسکی، باڵیۆزی ئەمریکا لە عێراق لە تویتێکدا نووسی: "خۆشحاڵبووم کە جارێکی دیکە لە هەولێرم و لەگەڵ قوباد تاڵەبانی، جێگری سەرۆکوەزیرانی هەرێمی کوردستان کۆبوومەوە. ئەمریکا پاڵپشتی لە هاوئاهەنگیی نێوان پارتی و یەكێتی دەکات لەسەر ئەو کێشانەی رووبەڕووی هەرێمی کوردستان و عێراق دەبنەوە."
باڵیۆزی ئەمریکا دەشڵێت، "بەردەوام هانی چاکسازیی لە هێزەکانی پێشمەرگە، مافەکانی مرۆڤ و دڵنیایی لە بەڕێوەچوونی هەڵبژاردنی پەرلەمانیی هەرێمی کوردستان دەدەم لە زووترین کاتدا".
لای خۆیەوە، نووسینگەی قوباد تاڵەبانی، جێگری سەرۆکوەزیرانی هەرێمی کوردستان لە راگەیێندراوێکدا گوتی، هەردوولا هاوڕابوون کە "پێویستە بە گفتوگۆ هەموو کێشەکان چارەسەر بکرێن. قوباد تاڵەبانی نەیشاردەوە نیگەرانە لە بەردەوامی ناکۆکییە سیاسییەکان، بەوپێیەی کاریگەری خراپی لەسەر ژیان و گوزەرانی هاوڵاتییان دروست کردوە و پێگەی هەرێمی کوردستانیشی لە بەغدا لاواز کردوە."
سەبارەت بە هەڵبژاردنەکانی پەرلەمانی کوردستانیش، جێگری سەرۆک وەزیران رایگەیاند "پێویستە هەماهەنگی هەبێت تا بتوانرێت لە ماوەیەکی نزیکدا و بە باشترین شێوە هەڵبژاردنەکان بەڕێوەبچێت. داواشیکرد ئەمریکا و هاوپەیمانان هاوکاربن و رۆڵی خۆیان ببینین لە نزیککردنەوەی بۆچوونی لایەنەکان."
لە تەوەرێکی دیکەی کۆبوونەوەکەدا باسی پڕۆژە یاسای بودجەی عێراق کرا، لەمبارەیەشەوە قوباد تاڵەبانی هیوای خواست یاساکە بە جۆرێک پەسند بکرێت کە لە بەرژەوەندی هاوڵاتییانی هەرێمی کوردستان و هەموو عێراقدا بێت. داواشیکرد پەرلەمانتارانی عێراق لەکاتی دەنگدان بە پڕۆژە یاساکە بەرژەوەندییەکانی هەموو هاوڵاتییانی عێراق لەبەرچاو بگرن. ئەوەش بەگوێرەی نووسینگەی قوباد تاڵەبانی.
.jpg&w=3840&q=75)
.jpg&w=3840&q=75)
