رووداو دیجیتاڵ
ئەمڕۆ سێشەممە 05-12-2023 دادگەی باڵای فیدراڵیی عێراق تاوتوێی سکاڵایەکی وەهاب هەڵەبجەیی دەکات لە دژی ئەو سزایانەی لە دادگەی هەولێر لە دژی دەرکراون؛ داواش دەکات دادگەکە ماوەی کارپێکردنی جێبەجێکردنی یاسای بەرەنگاربوونەوەی تیرۆر لە هەرێمی کوردستان بە نادەستووری بزانێت.
بەگوێرەی خشتەی دانیشتنەکانی دادگەی باڵای فیدراڵیی عێراق، ئەمڕۆ سێشەممە 05-12-2023 تاوتوێی سکاڵایەکی وەهاب هەڵەبجەیی، بەڕێوەبەری گشتیی دژە تیرۆری سلێمانی و ئەندامی سەرکردایەتیی یەکێتی دەکات، کە داوا دەکات دادگەکە ماوەى کارپێکردنى جێبەجێکردنى یاسای ژمارە 3ى ساڵى 2006ى بەرەنگاربوونەوەى تیرۆر بە نادەستوورى بزانێت، کە بەگوێرەى یاسای ژمارە 7ى ساڵى 2018 دیاریکراوە، جگە لەوەش سەرجەم ئەو سزایانەی لە دادگەکانی هەولێر لە دژی ئەو دەرچوون، هەڵبوەشێندرێنەوە.
بەپێی زانیارییەکانی رووداو، دادگەکە لە دانیشتنی پێشوو لە 13-11-2023دا، داوای هەندێک بەڵگەنامەی لەبارەی چەند دۆسیەیەکی پەیوەندیدارەوە کردووە، لەنێویاندا ئەو سزایەی کە لەلایەن دادگەی هەولێرەوە بۆ وەهاب هەڵەبجەیی دەرچووە، جگە لە ژمارەیەک بەڵگەنامەی دیکە کە پەیوەندیی بە وردەکاریی سزاکە و یاسای بەرەنگاربوونەوەی تیرۆر و ئەو بەڵگەنامانەی لە لێکۆڵینەوەی کەیسی تیرۆرکردنی هاوکار جاف پشتیان پێبەستراوە.
دادگەکە 29ى تشرینى یەکەم تاوتوێى ئەو سکاڵایەی کرد، کە وەهاب هەڵەبجەیی، بەڕێوەبەری گشتیی دژەتیرۆری سلێمانی لە دژى سەرۆکى پەرلەمانى کوردستان تۆماری کردبوو، بەڵام سکاڵاکەی بۆ 13ی مانگی رابردوو دواخستبوو، دواتر بۆ ئەمڕۆ سێشەممە 05-12-2023 دوایخست.
یاساى بەرەنگاربوونەوەى تیرۆر لە ساڵى 2006 لە پەرلەمان پەسند کرا. لە مادەى 18دا ئاماژە بەوە دراوە، بۆ ماوەى دوو ساڵ کار بە یاساکە دەکرێت لە رۆژى بڵاوکردنەوەى لە رۆژنامەى وەقائیعی کوردستان.
لە ساڵى 2018 پەرلەمانی کوردستان یاساى کارپێکردن بە یاسای بەرەنگاربوونەوەى تیرۆرى دەرکرد، کە تێیدا ئاماژە بەوە دراوە کە کار بەو یاسایە دەکرێت؛ بەبێ ئەوەى ئاماژە بە وادەیەکى دیاریکراو بکات، کە تێیدا یاساکە کارا دەبێت، وەکو ئەوەى لە یاساکەى ساڵى 2006 هاتووە، کە بۆ ماوەى دوو ساڵ بووە.
7ى تشرینى یەکەمى 2022 لە گەڕەکی سەربەستیی شاری هەولێر، دوو بۆمب بە ئۆتۆمبێلێکدا تەقینەوە و لە ئەنجامدا عەقید هاوکار عەبدوڵڵا، ناسراو بە هاوکار جاف گیانی لەدەستدا و لەسەر ئەو دۆسیەیە لە 4ى حوزەیرانى 2023، دادگەی تاوانی هەولێر، بە غیابی سزاى لەسێدارەدانى بۆ شەش کەس دەکرد، کە وەهاب هەڵەبجەیی یەکێکیان بوو.
پێشتر لە 12ى تشرینى یەکەمى 2022 ئەنجوومەنی ئاسایشی هەرێمی کوردستان لە ڤیدیۆیەکدا دانپێدانانی شەش کەسی بڵاوکردەوە کە تۆمەتبار کرابوون بە کوشتنی هاوکار جاف، ئەفسەری پێشووی دژەتیرۆری یەکێتی. ئەنجوومەنی ئاسایش لە ڤیدیۆکەیدا تیمێکی دژەتیرۆری سلێمانی بە کوشتنی هاوکار جاف تۆمەتبار دەکات و دەڵێت، بە فەرمانی راستەوخۆی "بەرپرسی دژەتیرۆری سلێمانی" و "بەرپرسی هەواڵگریی دژەتیرۆری سلێمانی" کراوە، بەڵام دواتر دەزگای دژەتیرۆری سلێمانی، راگەیێندراوەکەی ئەنجوومەنی ئاسایشی رەتکردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ