حکومەتی ئێران بڕیارێکی بە بۆنەی شەوی یەڵداوە دەرکرد

ئەمڕۆ یەکشەممە، 21ی کانوونی یەکەمی 2025، فاتمە مهاجرانی، گوتەبێژی حکومەتی ئێران لە تۆڕی کۆمەڵایەتیی ئێکس بڵاویکردەوە، بە بریاری ئەنجوومەنی وەزیرانی ئێران، سبەی دووشەممە سەرجەم دامودەزگە حکومییەکان، قوتابخانە و ناوەندەکانی دیکەی خوێندن دوو کاژێر درەنگتر دەکرێنەوە.

فاتمە مهاجرانی رایگەیاند: "بە مەبەستی پاراستنی بەها خێزانییەکان و بەرزڕاگرتنی رێوڕەسمە کۆنەکانی ئێران لە شەوی یەڵدا، ئەنجوومەنی وەزیران رەزامەندی دەربڕی کە سبەینێ سەرجەم قوتابخانەکان، فەرمانگە و دامەزراوە حکومییەکان دوو کاژێر درەنگتر دەست بە کارەکانیان بکەن."

بە گوتەی فاتمە مهاجرانی، بڕیارەکە دامودەزگە خزمەتگوزارییە گشتییەکان و نەخۆشخانەکان ناگرێتەوە.

شەوی یەڵدا، دوایین شەوی پاییز و درێژترین شەوی ساڵە. لە ئێران و رۆژهەڵاتی کوردستان بایەخێکی زۆری پێدەدرێ و خێزانەکان وەک نەریتێکی کۆن، ئەو شەوە لە دەوری یەک کۆدەبنەوە و بە رازاندنەوەی سفرە و خوانیان شەوەکە بەڕێدەکەن. 

ساڵانە لە شەوی یەڵدا لە هەرێمی کوردستان چەندین چالاکیی جیاواز لەلایەن کەرتی تایبەت و رێکخراوەکانەوە بەڕێوە دەبرێن.