رووداو دیجیتاڵ
ژنێک لە فڕۆکەخانەی مێهرئابادی تاران، مەندیل لەسەری مەلایەک دەکاتەوە و وەکو لەچک بەکاریدەهێنێت، دواتر بە بە مەلاکە دەڵێت، "ئەوەت دەویست؟".
بەپێی ڤیدیۆیەک کە ئەمڕۆ لە تۆڕە کۆمەڵایەتییەکان بڵاوکراوەتەوە، ژنەکە بە تووڕەیی بەرەو مەلایەکی شیعە مەزهەب دەچێت و مەندیلەکەی لەسەر دەکاتەوە.
ژنەکە پێش ئەوەی مەندیلی مەلاکە ببات، لەچکی لەسەر نییە و لە قسەکانییەوە پێدەچێت مەلاکە هۆشداری پێدابێت یان هێزە ئەمنییەکانی فڕۆکەخانەکەی لە پابەندنەبوونی ژنەکە بە "باڵاپۆشی ناچاری" ئاگادار کردبێتەوە.
بە ڤیدیۆ.. لە فڕۆکەخانەی مێهرئابادی تاران ژنێک بەتووڕەییەوە دەچێتە لای مەلایەک، مەندیل لەسەری مەلاکە دەکاتەوە و دەڵێت، ئەوەت دەویست؟
— Rudaw (@Rudawkurdish) January 6, 2025
ژنەکە لەچکی لەسەر نییە و پێدەچێت مەلاکە هۆشداری پێدابێت یان هێزە ئەمنییەکانی فڕۆکەخانەکەی ئاگادارکردبێتەوە pic.twitter.com/VYITgOpIEH
بەپێی قسەکانی ژنەکە، پێدەچێت ئەو لەگەڵ هاوژینەکەی لە هۆڵی چاوەڕوانی فڕۆکەخانەی تاران دانیشتبێت و بەهۆی پابەندنەبوون بە باڵاپۆشی تووشی کێشە کرابێت و ئەو ژنە مەلاکە بە هۆکار دەزانێت. ژنەکە دوای گەڕانەوە بۆ شوێنی دانیشتنی خۆیان لە هۆڵی چاوەڕوانیی فڕۆکەخانەکە بەدوای هاوژینەکەیدا دەگەڕێت و هاوار دەکات "بۆ کوێتان برد؟".
دوای بڵاوبوونەوەی ڤیدیۆکە، میدیاکانی نێوخۆی ئێران هەواڵێکی هاوشێوەیان لەبارەی ئەو رووداوە بڵاوکردووەتەوە و تێیدا پشتڕاست کراوەتەوە، ژنەکە لە لایەن هێزە ئەمنییەکانی فڕۆکەخانەوە دەستبەسەر کراوە، بەڵام دوای چەند کاژێرێک ئازاد کراوە. لە هەواڵەکەدا رەتکراوەتەوە، ئەو هەڵسوکەوتە پەیوەندی بە بابەتی باڵاپۆشییەوە هەبێت و نووسراوە، ژنەکە "کێشەی دەروونی" هەبووە و ئەوانەشی هێرشی کردووەتە سەریان، لە سکاڵاکەیان پاشگەز بوونەتەوە.
.jpg&w=3840&q=75)