سوودانی دەڵێت، ئیسرائیل بە کوشتنی حەسەن نەسروڵڵا 'هەموو هێڵە سوورەکانی بەزاند'

ئەمڕۆ شەممە، 28-9-2024، محەممەد شیاع سوودانی، سەرۆکوەزیرانی عێراق لە راگەیێندراوێکدا سەرکۆنەی کوشتنی حەسەن نەسروڵڵا، ئەمینداری گشتی حیزبوڵڵای لوبنانی کرد و هێرشەکەی ئیسرائیلی بۆ سەر بارەگای سەرەکی حیزبوڵڵا لە بەیرووت بە  "تاوان و شەرمەزارکەرانە" ناوبرد.

سوودانی، هاوکات، بەهۆی کوژرانی حەسەن نەسروڵڵاوە سێ رۆژ ماتەمینیی گشتیی لە عێراق راگەیاند. 

سەرۆکوەزیرانی عێراق دەڵێت، ئیسرائیل هەموو هێڵە سوورەکانی بەزاندووە و حەسەن نەسروڵڵاشی بە "شەهیدی رێگەی راست" ناوبرد. 

دوێنێ هەینی، 27-09-2024، سوپای ئیسرائیل هێرشێکی ئاسمانی کردە سەر باشووری بەیرووت و بڵاویکردەوە، بارەگای سەرەکیی حیزبوڵڵای کردووەتە ئامانج. 

رۆژی شەممە، 28-09-2024، سوپای ئیسرائیل بڵاویکردەوە، حەسەن نەسروڵڵا، ئەمینداری گشتیی حیزبوڵڵا لە هێرشەکەی دوێنێی سوپای وڵاتەکەی بۆ سەر بەیرووت کوژراوە. حیزبوڵڵاش دوا نیوەڕۆی ئەمڕۆ شەممە هەواڵەکەی پشتڕاستکردەوە.

شەڕ و پێکدادانی نێوان حیزبوڵڵا و ئیسرائیل یەک رۆژ دوای هەڵگیرسانی جەنگی غەززە لە 07-10-2023 دەستیپێکرد، بەڵام لە 23ـی ئەم مانگەوە بۆردوومانەکانی ئیسرائیل بۆ سەر باشووری لوبنان و بەیرووت چڕتربوونەوە.

بەگوێرەی وەزارەتی تەندروستیی لوبنان، لە چەند رۆژی رابردوودا زیاتر لە 700 کەس لە لوبنان کوژراون.