رووداو دیجیتاڵ
میدیاکانی ئێران دەستپێکردنی شەپۆلی 21ی ئۆپەراسیۆنی "بەڵێنی راستگۆ 3"یان راگەیاند و دەڵێن، ئامانجە سەربازییەکان و ناوەندەکانی پشتیوانی لە باکوورەوە تاوەکو باشووری ئیسرائیل، بەتایبەتی لە حەیفا و تەل ئەڤیڤ، کراونەتە ئامانج.
بەگوێرەی راگەیێندراوێک کە لە میدیاکانی ئێراندا بڵاوکراوەتەوە، شەپۆلی 21ی ئۆپەراسیۆنەکە دژی ئامانجە سەربازییەکانی ئیسرائیل دەستیپێکردووە.
لە راگەیێندراوەکەدا ئاماژە بەوە دراوە، ئەم شەپۆلە نوێیەی هێرشەکان، ئۆپەراسیۆنێکی تێکەڵاوە و لە رێگەی مووشەک و درۆنەوە دەکرێت. ئامانجەکانیش بریتیین لە پێگە سەربازییەکان و ناوەندەکانی پشتیوانیی سەربازی لە باکوورەوە بۆ باشووری ئیسرائیل، بەتایبەتی لە حەیفا و تەل ئەڤیڤ.
ئێران بانگەشەی ئەوەش دەکات کە لە هێرشەکەدا مووشەکی سووتەمەنیی شل و رەق بەکاردەهێنێت، هەروەها تاکتیکی تایبەت پەیڕەو دەکات بۆ تێپەڕاندنی سیستمی بەرگریی ئیسرائیل.
هاوکات بەپێی ئەو گرتە ڤیدیۆییانەی لەلایەن میدیاکانی ئیسرائیلەوە بڵاوبوونەتەوە، لە چەندین ناوچەی ئیسرائیل مووشەک کەوتوونەتەخوارەوە و بوونەتە هۆی وێرانکاری لە شوێنی کەوتنەخوارەوەیان.
