وێنە؛ نۆیەمین فێستیڤاڵی نێودەوڵەتیی فۆتۆگرافیی...

گالەری

وێنە؛ نۆیەمین فێستیڤاڵی نێودەوڵەتیی فۆتۆگرافیی Xposure لە شاریقە

21-02-2025

9 Photos

بڵند تاهیر @Bilindtahir

رووداو دیجیتاڵ

فێستیڤاڵی نێودەوڵەتیی فۆتۆگرافی(Xposure)، یەکێک لە گەورەترین فێستیڤاڵەکانی رۆژهەڵاتی نێوەڕاست و جیهان لە بواری فۆتۆگرافی و وێنەگرتندا، بۆ نۆیەمین جار لە شاری شاریقەی ئیمارات بەڕێوەچوو. فێستیڤاڵەکە، کە 20ی شوبات دەستیپێکرد، هەفتەیەک بەردەوام دەبێت.

ئەم ساڵ فێستیڤاڵەکە ژمارەیەکی پێوانەیی لە بەشداربووانی تۆمارکردووە.

زیاتر لە 300 فۆتۆگرافەری نێودەوڵەتی بەشدارییان لە فێستیڤاڵەکەدا کردووە و زیاتر لە 2500 وێنەیان لە پێشانگەکانی فێستیڤاڵەکەدا نمایشکراون.

جگە لەوەش، زیاتر لە 100 گەلەریی هونەری و 50 وۆرکشۆپ لە فێستیڤاڵەکەدا هەن. کۆمپانیا گەورەکانی بواری فۆتۆگرافی و وێنەگرتنیش بەرهەم و خزمەتگوزارییەکانی خۆیان پێشکێش دەکەن.

ئەم ساڵ، فێستیڤاڵەکە میوانداریی چەندین فۆتۆگرافەری ناوداری جیهانی کرد، لەوانە: سێر دۆن مەککۆلین، گرێگ گۆرمان، جەیمس ناختوی و جۆرج شتاینمێتز. پێشانگەکانی فێستیڤاڵەکەش گشتگیربوون و چەندین ژانری هونەریی جیاوازیان لەخۆگرتبوو، لەوانە: فۆتۆی رۆژنامەڤانی، فۆتۆگرافیی بەڵگەنامەیی، فۆتۆگرافیی هونەری و داهێنەرانە، فۆتۆگرافیی سرووشت و گیانلەبەرە کێوییەکان، فۆتۆگرافیی پۆرترێت، وێنەگرتنی شەوانە و فۆتۆگرافیی ئەکشن.

Xposure تەنیا پێشانگەیەک نییە بۆ پێشاندانی وێنە، بەڵکو ناوەندێکە بۆ گەشەپێدانی پیشەیی و هونەریی فۆتۆگرافەران. رۆژانە چەندین وۆرکشۆپ لەلایەن فۆتۆگرافەرە بەئەزموونەکانی جیهانەوە بەڕێوەدەبرێن کە ئامانجیان پەرەپێدانی توانا و زانیاریی بەشداربووانە لە هەموو ئاستەکاندا.

ئەو وۆرکشۆپانە بوارە جیاوازەکانی فۆتۆگرافی دەگرنەوە و دەرفەتێکی ناوازە بۆ فێربوون و ئاڵوگۆڕی ئەزموون دەڕەخسێنن.

جگە لە لایەنە هونەری و پیشەییەکەی، فێستیڤاڵی Xposure ئامانجێکی گەورەتریشی هەیە، ئەویش بریتییە لە گۆڕینەوەی کولتووریی نێوان گەلانی جیهان لەڕێگەی هونەری فۆتۆگرافییەوە. فێستیڤاڵەکە دەرفەتێک بۆ هونەرمەندان و فۆتۆگرافەران لە سەرانسەری جیهان دەڕەخسێنێت بۆ ئەوەی کۆببنەوە و ئەزموون و بیرۆکەکانیان لەگەڵ یەکدیدا هاوبەش بکەن.

هەروەها، فێستیڤاڵەکە رۆڵێکی گرنگ دەگێڕێت لە بەهێزکردنی بواری فۆتۆگرافی لە ناوچەکەدا، لەڕێگەی پێشکەشکردنی دەرفەتی فێربوون و گەڕان بەدوای بەهرە نوێیەکاندا. کاریگەرییە ئابووری و بازرگانییەکانی فێستیڤاڵەکەش نابێت نادیدە بگیرێن، چونکە هاندەرێکی باشە بۆ بازرگانی و بازاڕکردنی کەرەستە و خزمەتگوزارییەکانی پەیوەست بە فۆتۆگرافی و هونەری بینراو.