رووداو دیجیتاڵ
بزووتنەوەی حەماس رایگەیاند، لە ئۆپەراسیۆنەکەی سوپای ئیسرائیلدا لە کەرتی غەززە، کە چوار لە بارمتەکانی بە زیندوویی رزگار کرد، 210 فەلەستینیی سڤیلی کوشتووە، بەڵام ئیسرائیل تۆمەتەکەی حەماس رەتدەکاتەوە.
نووسینگەی راگەیاندنی بزووتنەوەی حەماس لە راگەیێندراوێکدا ئاماژە بەوە دەکات، هێرشە تایبەتەکەی سوپای ئیسرائیل لە کەمپی نەسیرات لە نێوەڕاستی کەرتی غەززە کراوە، "بۆ رزگارکردنی ئەو چوار بارمتە، سوپای ئیسرائیل 210 کەسی سڤیلی کوشتووە و زیاتر لە 400 کەسیشی بریندار کردووە."
ئیسرائیل ئاماژە بەوە دەکات، لە ئۆپەراسیۆنەکەدا سەربازێکیان بریندار بووە.
لەبارەی وردەکاریی ئۆپەراسیۆنەکەوە، دانیاڵ هەگاری، گوتەبێژی سوپای ئیسرائیل رایگەیاند، "سوورین لەسەر ئەوەی سەرجەم بارمتەکان بگەڕێنینەوە، بەڵام دەزانین ژمارەی زیانەکانی حەماس کوژرانی کەمتر لە 100 چەکدار بووە."
زیاتر لە هەشت مانگ بەسەر جەنگی غەززەدا تێپەڕیوە و سوپای ئیسرائیل لەدوای ئازادکردنەکە رایگەیاند، ئێستا 116 بارمتە لەنێو غەززە ماون، کە 41یان کوژراون.