رووداو دیجیتاڵ
مەسرور بارزانی لەبارەی هێرشکردنە سەر دامەزراوە نەوتییەکان رایگەیاند، ئامانج لەو هێرشانە زیانگەیاندنە بە سەرچاوەی دارایی و ئابووریی هەرێمی کوردستان. قوباد تاڵەبانیش رایگەیاندووە، زانیاریی تەواویان هەیە لەسەر ئەو لایەنانەی هێرشەکەیان ئەنجامداوە.
ئەمڕۆ چوارشەممە 29-06-2022 لە کۆبوونەوەی ئەنجوومەنی وەزیراندا، بەپێی راگەیێندراوی سەرۆکایەتیی حکومەتی هەرێمی کوردستان، ئەنجوومەنی وەزیران لایەنە پەیوەندیدارەکانی راسپاردووە کە ئەرکی خۆیان لە "پارێزگاریکردن لە دامەزراوە نیشتمانییەکان کە سەرچاوەی دابینکردنی مووچە و خەرجییە گشتییەکانن جێبەجێبکەن".
مەسرور بارزانی، سەرۆکوەزیرانی هەرێمی کوردستان لە کۆبوونەوەکەدا رایگەیاندووە، "ئاشکرایە حکومەتی فیدڕاڵی بەبێ هیچ پاساوێکی یاسایی و دەستووریی، هەرێمی کوردستان لە شایستە داراییەکانی بێبەش دەکات کە لە کۆی 26 مانگ، تائێستا تەنيا بۆ ماوەی 13 مانگ بڕە پارەیەکی بە ناوی پێشینە کە تەنیا 200 ملیار دینارە ناردووە، لە کاتێکدا سەرجەم پابەندییە داراییەکانی هەرێمیان لە بەشە بودجەکەمان داشکاندووە".
هەر بەپێی راگەیێندراوەکە، قوباد تاڵەبانی، جێگری سەرۆکوەزیرانی هەرێمی کوردستان لە کۆبوونەوەکە رایگەیاندووە، زانیاریی تەواویان هەیە لەسەر ئەو لایەنەی هێرشەکانی کردووەتە سەر کێڵگەی گازی کۆرمۆر و لێکۆڵینەوەی وردیش کراوە بۆ ئەوەی رێکاریان بەرامبەر وەربگیرێت.
جێگری سەرۆکوەزیران ئاماژەی بەوەش داوە، "ھێرشە‌كان كراونە‌تە سەر پڕۆژە‌ی فراوانكردنی كێڵگە‌ی کۆرمۆر نەک ئەو بەشەی کە ئێستا گاز بەرهەم دەهێنێت بۆ دابینکردنی پێویستی هاووڵاتییان".
رۆژی چوارشەممە، 22-06-2022 بۆ یەکەمجار بە مووشەک هێرشکرایە سەر کێڵگەی گازی کۆرمۆر، دوا بە دوای ئەوەش دووجاری دیکە هێرشکرایە سەر ئەوە کێڵگەیە، بەڵام تاوەکو ئێستا هیچ لایەنێک بەرپرسیارێتیی خۆی لە هێرشەکە رانەگەیاندووە. کێڵگەی گازی کۆرمۆر رۆژانە توانای بەرهەمهێنانی 450 ملیۆن پێ سێجا گاز و هەزار و 100 تۆن گازی ئێڵ پی جی و 16 هەزار بەرمیل کۆندێسەیتی هەیە.
ئەنجوومەنی وەزیران دووپاتیکردووەتەوە کە هەمیشە پابەندبووە بە دەستوور و ئامادەیە بۆ رێککەوتن لەگەڵ حکومەتی فیدراڵی و چارەسەرکردنی کێشەکان لەسەر بنەمای دەستوور و شەفافانەش هەموو زانیارییەکانی سەبارەت بە داهات و خەرجی و قەرز و میلاکی وەزیفی، بە ژمارە خستووەتە بەردەم تیمی دیوانی چاودێریی دارایی عێراق، "بۆیە هیچ چارەسەرێک لە دەرەوەی دەستوور قبووڵکراو نییە".
لە بەشێکی دیکەی راگەیێندراوەکەدا ئەنجوومەنی وەزیران داوا لە حکومەتی عێراق و وەزارەتی نەوت دەکات کە "گوشاری ناڕەوایان بۆ سەر وەبەرهێنەرانی نێودەوڵەتی بواری نەوت و گاز لە هەرێمی [کوردستان] رابگرن، کە دەبوو وەک دەوڵەتی فیدرالی، پشتیوانی پێشکەوتن و بووژاندنەوەی ئابووریی هەرێمی کوردستان بن، نەک گوشاری ناڕەوا بکەن بۆ پەکخستنی ئەو بووژانەوەیە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ