رووداو دیجیتاڵ
بەڕێوەبەرایەتیی رێگەوبانی بەردەڕەش، لە سنووری ناحیەی رۆڤیا کرایەوە. وەزیری ئاوەدانکردنەوە دەڵێت، کردنەوەی بەڕێوەبەرایەتییەکە بۆ ئەو سنوورە "زۆر پێویست بوو".
پێشتر بەردەڕەش بەڕێوەبەرایەتیی رێگەوبانی نەبوو، رێگەوبانی ئاکرێ کاری نۆژەنکردنەوە و چاککردنی رێگەوبانی لە سنووری بەردەڕەشیش دەکرد. ئەمڕۆ، سێشەممە 29ـی نیسانی 2025، دانا عەبدولکەریم، وەزیری ئاوەدانکردنەوە، بەڕێوەبەرایەتیی رێگەوبانی بەردەڕەشی لەنزیک گوندی پیرچاوشی سنووری ناحیەی رۆڤیا کردەوە.
دانا عەبدولکەریم رایگەیاند، لە بەردەڕەش نزیکەی 900 کیلۆمەتر رێگەی سەرەکی و لاوەکی و رێگەی گوندەکان هەن، کە بەردەوام پێویستیان بە چاودێری و نۆژەنکردنەوە هەیە، بۆیە کردنەوەی ئەو بەڕێوەبەرایەتییەی لەو سنوورە بە "زۆر گرنگ" وەسفکرد.
لە کاتی کردنەوەی بەڕێوەبەرایەتییەکە، بەشێک لە دانیشتووانی گوندی پیرچاوش لەوێ کۆبوونەوە. داوایان کرد رێگەی گوندەکەیان قیرتاو بکرێت، چونکە ئەو بەڕێوەبەرایەتییە دەکەوێتە سەر رێگەی گوندەکە و رێگەکەیان تێکچووە.
دانیشتووانی چەند گوندێکی رۆڤیا داوای چاککردنی رێگەکەیان دەکەن و وەزیری ئاوەدانکردنەوەش دەڵێت، یەکەم کاری رێگەوبانی بەردەڕەش چاککردنی ئەو رێگەیە دەبێت pic.twitter.com/ggM2bCM3yx
— Rudaw (@Rudawkurdish) April 29, 2025
ئەیووب محەممەد، دانیشتووی گوندەکە بە رووداوی گوت، گوندەکانی پیرچاوش، کانی ئەسپەهانی گەورە و بچووک، لەگەڵ گوندی قادرئاوا لەسەر ئەو رێگەیەن و رێگەکەش تێکچووە، بۆیە "داوا دەکەین رێگەکەمان بۆ چاک بکەن".
حەیدەر دۆسکی، پەیامنێری رووداو داواکاریی دانیشتووانی ئەو گوندەی لە وەزیری ئاوەدانکردنەوە کرد، دانا عەبدولکەریم رایگەیاند، "داواکارییەکانیان بە هەند وەردەگرین، دەرخستەکان کە پێویستە بۆ چاککردنی رێگەی ئەم گوندە، بەڕێوەبەرایەتیی تازەمان راسپاردووە بۆ ئەوەی بەرزی بکەنەوە بۆ وەزارەت و لەگەڵ دابینکردنی پارە، بۆیان چاک دەکەین. یەکەم کاری ئەم بەڕێوەبەرایەتییە چاککردنی رێگەوبانی ئەم چەند گوندەیە".
قەزای بەردەڕەش لە رووی کارگێڕییەوە سەر بە پارێزگای دهۆکە، سێ ناحیە و زیاتر لە 106 گوند لەخۆدەگرێت.
