رووداو - هەولێر
حکومەتی هەرێمی کوردستان کار بۆ کەمکردنەوەی رۆتین لە فەرمانگەکاندا دەکات، ئەوەش بەهۆی ئەوەی لە زۆرینەی فەرمانگەکاندا هاونیشتمانیان دەبێ چەندین کاژێر سەرقاڵی راییکردنی مامەڵەکانیان بن.
رووبەری بەشی مۆڵەت لە بەڕێوەبەرایەتی هاتووچۆی هەولێر 30 دۆنم زەویە و 15 دۆنمی کراوەتە باڵەخانە و شوێنی کار، بەڵام هێشتا هاونیشتمانیان گلەیی نەبوونی شوێن دەکەن. رۆژانە نزیکەی دوو هەزار کەس بۆ دەرهێنانی مۆڵەتی شوفێری دەچنە ئەو فەرمانگەیە.
یەکێک لە هۆکارەکانی رۆتین و درەنگ تەواوکردنی مامەڵەی هاونیشتمانیان بە ئەلیکترۆنینەکردنی فەرمانگەکانی حکومەتە، هێشتاش لە زۆربەی فەرمانگەکان کار بە سیستەمی کۆن دەکرێت. بەڵام کابینەی نۆیەم لە دوو کۆبوونەوەی سەرەتایدا بە بڕیار جەختی لەسەر نەهێشتنی رۆتین لە دامودەزگاکانی حکومەت کردەوە.
لە هەرێمی کوردستان کە دانیشتووانەکەی پێنج ملیۆن کەسە، نزیکەی 700 هەزار فەرمانبەری هەن. واتە ئەگەر رۆژانە ئەو هاونیشتمانیانەی فەرمانبەر نین، کە نزیکەی چوار ملیۆن و 300 هەزار کەسن، روو لە فەرمانگەکان بکەن، هەر فەرمانبەرەی شەش سەردانکاری بەردەکەوێت.