رووداو دیجیتاڵ
بە بەشداریی چەند لیوایەکی پێشمەرگە و بە هاوبەشی لەگەڵ سوپای عێراق، ئۆپەراسیۆنێکی فراوان لە سنووری گەرمیان لە بۆشاییە ئەمنییەکانی سنوورەکە دژی چەکدارانی داعش دەستیپێکرد. فەرماندەی یەکێک لە لیواکان دەڵێت، هەندێک پاشماوەی داعشیان دۆزیوەتەوە.
ئۆپەراسیۆنە هاوبەشەکەی هێزەکانی پێشمەرگە و سوپای عێراق ئەمڕۆ شەممە، 27ـی ئایاری 2022، کاژێر 05:00ـی بەرەبەیان دەستیپێکرد؛ هەریەکە لە لیواکانی 3، 5، 9، 17 و 711ـی پێشمەرگە تێیدا بەشدارن. عەقید حەکیم ساتی، فەرماندەی لیوای 17ـی هێزەکانی پێشمەرگە بە تۆڕی میدیایی رووداوی گوت، "ئێمە لە بەرەکانی قۆری چای و پەلکانەین و بەرەو غەڕە دەچین؛ لیواکانی دیکەش هەریەکە و لە بەرەیەکەوە لە ئۆپەراسیۆنەکە بەردەوامن".
ئۆپەراسیۆنەکە ئەو ناوچانە دەگرێتەوە کە پێیان دەگوترێت بۆشایی ئەمنی، واتە نە هێزی پێشمەرگەی تێدایە و نە سوپای عێراق.
عەقید حەکیم دەڵێت، ئەو بۆشاییە ئەمنییانە داعش ناوبەناو بۆ هێرش و جموجووڵەکانیان بەکاریان دەهێنن و ئامانجی ئۆپەراسیۆنەکەش نەهێشتنی داعش لەو ناوچانە.
فەرماندەی لیوای 17ـی پێشمەرگە گوتی، "ئامانجی سەرەکیی ئۆپەراسیۆنەکە دوو خاڵە: یەکەم، پاککردنەوەی ناوچەکە و رەوەدوونانی داعش تێیدا؛ دووەمیش گەڕانەوەی یاسا و ئاسایش بۆ ناوچەکە".
تاوەکو ئامادەکردنی ئەم هەواڵە لەو میحوەرەی لیوای 17 ئۆپەراسیۆنەکەی تێدا دەکەن، چەند پاشماوەیەکی چەکدارانی داعش و بڕێک تەقەمەنی دۆزراونەتەوە. فەرماندەی لیواکە گوتی، لە رابردووشدا لەو ناوچانە ئۆپەراسیۆن بە هەمان ئامانج هەبووە و زیاتر لەم ئۆپەراسیۆنە پاشماوە و کەرەستەی چەکدارانیان داعشیان دۆزیوەتەوە.
بەگشتی ئۆپەراسیۆنەکە سنووری قەزاکانی ئیدارەی گەرمیان لە هەرێمی کوردستان، هەروەها قەزاکانی خانەقین و خوورماتوو لە باشووری کوردستان دەگرێتەوە و زۆرینەی ناوچەکان دانیشتووانەکەی هاونیشتمانییانن.
دوای هێرشەکانی 16ـی ئۆکتۆبەری 2017، بەشێک لە سنوورەکانی نێوان باشووری کوردستان و عێراق هیچ هێزێکی عێراقی و هەرێمی کوردستانیان تێدا نەما، بەهۆیەوە ناوبەناو کردەوەی رفاندن و کوشتنی هاووڵاتییانی ئەنجام دەدرێت و دەگوترێت چەکدارانی داعش لەو سنوورانە ئەنجامدەری کردەوەکانن.
