فڕۆکەوانێکی کورد لە رووداوەکەی ئیسفەهان گیانی لەدەستداوە

بەپێی میدیای فەرمیی ئێران، ئەو فڕۆکەوانە ناوی (موجتەبا کیانی)یە و خەڵکی شاری کەنگەوەرە لە پارێزگای کرماشان؛ پلەکەی لەنێو هێزی ئاسمانیی ئێراندا مولازمی دووەم بووە.

بڕیارە رۆژی شەممە، 28-02-2026، کاژێر 10:00ی بەیانی، رێوڕەسمی بەخاکسپاردنی تەرمی ئەو فڕۆکەوانە کوردە لە زێدی خۆی لە شاری کەنگەوەر بەڕێوەبچێت.

رۆژی سێشەممە، 24-02-2026، هێلیکۆپتەرێکی سوپا لە شارۆچکەی "دۆرچە" سەر بە قەزای خومەینی شار لە پارێزگای ئیسفەهان، لەنێو مەیدانی میوە و سەوزەدا کەوتەخوارەوە.

لەو رووداوەدا چوار کەس گیانیان لەدەستدا؛ دووانیان فڕۆکەوان و یاریدەدەری فڕۆکەوان بوون، دوو کەسەکەی دیکەش ئەو کاسبکارانە بوون کە لە کاتی کەوتنەخوارەوەی هێلیکۆپتەرەکەدا، لەناو مەیدانی میوە و سەوزەکەدا خەریکی کارکردن بوون.