جێگری پارێزگاری هەولێر: 1000 بیر و 900 موەلیدەمان لەکارخستوون و "سیتی پاس" جێبەجێ دەکرێت

مەسعود کاڕەش، جێگری پارێزگاری هەولێر لەکاتی بەشداریکردنی لە بەرنامەی (مژار)ی رادیۆی رووداو، وردەکاریی ژمارەیەک پڕۆژەی ستراتیژیی لە سێکتەرەکانی ئاو، کارەبا و رێگەوبان خستەڕوو.

سەبارەت بە چارەسەرکردنی گرفتەکانی ئاو لە هەولێر و دەوروبەری، مەسعود کاڕەش رایگەیاند، پڕۆژەی فریاگوزاریی ئاو کێشەی بێئاوی لە ناوەندی هەولێر، بنەسڵاوە، دارەتوو، بەحرکە، عەنکاوە و قوشتەپە چارەسەر کردووە.

جێگری پارێزگاری هەولێر گوتی، "بەهۆی ئەم پڕۆژەیەوە نزیکەی 1000 بیر لە هەولێر و دەوروبەری لەکارخراون، ئەمەش دەبێتە هۆی بەرزبوونەوەی ئاستی ئاوی ژێر زەوی، کە بەهۆی وشکەساڵییەوە مەترسیی لەسەر بوو."

لەبارەی گلەیی دانیشتووانی پڕۆژەکانی وەک (مارینا 1، 2 و 3، ئەندازیاران و تەلار سیتی) کە دەڵێن ئاوی پڕۆژەی فریاگوزارییان پێنەگەیشتووە، مەسعود کاڕەش گوتی، "هەندێک گرفتی کارگێڕییە و بەهۆی نەبەستنی پێوەری ئاو بووە، دەبێت ئەو هاوبەشانە پێوەری ئاویان بۆ دابنرێت و هاوبەشی تۆمار بکەن، ئەوکات ئاویان پێدەگات."

سەبارەت بە لێڵبوونی ئاویش لە دوو هەفتەی رابردوودا، هۆکارەکەی بۆ "یەکەم باران و لێڵبوونی سەرچاوەی ئاوی زێی گەورە" گەڕاندەوە و دڵنیایی دا، کێشەکە کاتییە.

لەبارەی سێکتەری کارەباوە، کاڕەش ئاماژەی بە "سەرکەوتن"ی پڕۆژەی (رووناکی) کرد و گوتی، "لەو گەڕەکانەی بوونەتە کارەبای 24 کاژێری، هیچ موەلیدەیەکی ئەهلی نەماوە، بەمەش نزیکەی 900 بۆ 1000 موەلیدە کوژێندراونەتەوە و شار لە دەنگەدەنگ و دووکەڵ رزگاری بووە."

تەوەرێکی دیکەی قسەکانی جێگری پارێزگار، پڕۆژەی نۆژەنکردنەوەی رێگەی کانی قرژاڵە بۆ گومرگ بوو. بە گوتەی کاڕەش، بەهۆی خراپیی ژێرخانی رێگەکە، بودجەکەیان لە دوو ملیار دینارەوە بۆ نزیکەی 5 ملیار دینار زیاد کردووە، سایدی گەڕانەوەی رێگەکەش کراوە بە سێ هێڵ.

مەسعود کاڕەش شۆفێرانی ئاگادار کردەوە و گوتی، "بەم نزیکانە سایدی رۆیشتن دادەخرێت بۆ نۆژەنکردنەوە، داوا لە شۆفێران دەکەین رێگەی (رەشکین) یان رێگەی گوێڕ وەکو جێگرەوە بەکاربهێنن تاوەکو لە ماوەی دوو مانگدا پڕۆژەکە تەواو دەبێت."

لەبارەی رێگەی هەولێر - کۆیەش رایگەیاند، رێژەی کارکردن تێیدا گەیشتووەتە 30% بۆ 40%.

سەبارەت بەو هاونیشتمانییانەی خاوەنی زەویی کارتن، مەسعود کاڕەش ئاشکرای کرد، "لە کۆی نزیکەی 140 هەزار پارچە زەویی کارت، 97%یان کراون بە تاپۆ و کێشەکەیان چارەسەر کراوە، ئەوەی دیکەش کە ماون قۆناخ بە قۆناخ چارەسەر دەکرێن."

بۆ کەمکردنەوەی جەنجاڵی هاتووچۆ، جێگری پارێزگاری هەولێر ئاشکرای کرد، گرێبەستی پڕۆژەی "سیتی پاس" لەنێوان وەزارەتی گواستنەوە و کۆمپانیای جێبەجێکار واژۆ کراوە و ئێستا لە قۆناخی کۆکردنەوەی داتا و رووپێوی و هەڵسەنگاندندان.

هەروەها باسی لە پڕۆژەی ئاوەڕۆی قورسی هەولێر کرد و گوتی، "پڕۆژەکە بە شێوازی تۆنێلی ژێر زەوی جێبەجێ دەکرێت بۆ ئەوەی شەقامەکان نەبڕدرێن، ئاوی پیس لەبری رژانە ناو زێی گەورە، پاک دەکرێتەوە و بۆ کشتوکاڵ سوودی لێ دەبیندرێت."

لە کۆتاییدا سەبارەت بە بودجەی ساڵی 2026ـی پەرەپێدانی پارێزگاکان، مەسعود کاڕەش گوتی: "داوای نزیکەی 300 ملیار دینارمان کردووە، بەڵام پێشبینی دەکەین نزیکەی 120 ملیار دینار بۆ پارێزگای هەولێر تەرخان بکرێت."