رووداو دیجیتاڵ
کەسانێکی نەناسراو لە پارێزگای خارپێتی باکووری کوردستان، بەشێک لە رێنوێنییەکانی هاتووچۆیان سڕیوەتەوە، کە بە زمانی کوردی نووسراون.
ئەو گرووپە نەناسراوە بەرەبەیانی رۆژی یەکشەممە 22-09-2024 لە چەند شەقامێکی شارۆچکەی دێپ لە پارێزگای خارپێت، ئەو رێنوێنییانەیان سڕیوەتەوە، کە بە زمانی کوردی نووسراون.
شارەوانیی دێپ لەلایەن پارتی یەکسانی و دیموکراسیی گەلان (دەم پارتی) بەڕێوەدەبرێت، لە ماوەی رابردوودا زمانی کوردیشی بۆ رێنوێنییەکانی هاتووچۆ زیاد کرد.
لە شەقامەکاندا لە تەنیشت زمانی تورکی، بە زمانی کوردیش نووسینەکانی وەکو (پێشتر پیادە) و (لەسەرخۆ بە) وەکو رێنوێنی نووسراوە.
دوای رووداوەکە، سۆنگول دوزگون، هاوسەرۆکی شارەوانیی ناوچەی دێپ لە تۆڕی کۆمەڵایەتیدا پۆستێکی بە زمانی کوردی بڵاوکردەوە، کە تێیدا هاتووە:"ئەو نەژادپەرستانەی بەرگەی زمانی کوردی ناگرن، ئێمە پێیان دەڵێین: زمانمان ناسنامە و شەرەفمانە."
ئەو رووداوە لەکاتێکدایە، پێشتر لە پارێزگاکانی ئامەد و ئێلهیش هەمان رێنمایی کە بە زمانی کوردی نووسرابوون، لەلایەن پۆلیسەوە و بە بڕیاری پارێزگار سڕانەوە. ئەو کات پارێزگا باسی لەوە کرد کە ئەو نووسینە کوردییانە پێشێلکارییە.
ئەوە کاردانەوەی تووندی لەلایەن دەم پارتی و جەماوەرەکەی لێکەوتەوە و دواجار نووسینە کوردییەکان لەلایەن شارەوانییەوە دووبارە نووسرانەوە.
لە دوایین هەڵبژاردنی شارەوانییەکانی تورکیا و باکووری کوردستان کە رۆژی 31-03-2024 بەڕێوەچوو، دەم پارتی 36.82%ی دەنگەکانی ناوچەی دێپی بەدەستهێنا و شارەوانییەکەی بردەوە. هەروەها ئاکپارتی 33.57% و پارتی سەرلەنوێ رەفاهـ 25.65%ی دەنگەکانیان بردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ