رووداو دیجیتاڵ
بەهۆی تەقینەوەی کۆگەیەکی یارییە ئاگرینەکان لە شاری ورمێی رۆژهەڵاتی کوردستان، چوار کەس گیانیان لەدەستدا و دوو کەسی دیکەش بریندار بوون.
ئەمڕۆ هەینی، لە شەقامی وەلیعەسری ورمێ کۆگەیەکی یارییە ئاگرینەکان لەنێو ماڵێکدا تەقییەوە و خانووەکەی بە تەواوی رووخاند.
حوسێن سەرباز رەشید، بەڕێوەبەری بەرگریی شارستانیی ورمێ بە میدیاکانی راگەیاند، "ئێوارەی ئەمڕۆ دەنگی تەقینەوەیەکی گەورە لە گەڕەکی وەلیعەسر بیسترا و دوای گەیشتنی تیمەکانمان، زانیمان تەقینەوەکە بەهۆی یارییە ئاگرینەکانەوە بووە و ماڵەکەی بە تەواوی رووخاندووە".
بە گوتەی حوسێن سەرباز رەشید، "تەقینەوەکە هیچ ئاگرێکی لێ نەکەوتووەتەوە و تیمەکانمان توانییان شەش کەس لەژێر داروپەردووی خانووەکە بهێننە دەرەوە".
هاوکات حەمید مەحبووبی، بەڕێوەبەری کۆمەڵەی مانگی سووری پارێزگای ورمێ رایگەیاند، لە ئەنجامی تەقینەوەکە چوار کەس گیانیان لەدەستدا و دوو کەسی دیکە بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ