رووداو دیجیتاڵ
لە دێلوڕانی سەر بە پارێزگای ئیلام، سێ هاونیشتمانی بەهۆی خواردنی قارچکەوە ژەهراوی بوون. بەڕێوەبەری فریاکەوتنی ئیلام دەڵێت، دوای وەرگرتنی چارەسەری سەرەتایی لە دێلوڕان، گواستراونەتەوە بۆ نەخۆشخانەیەکی ناوەندی پارێزگاکە.
رووداوەکە دوێنێ هەینی 18-04-2025 لە گەڕەکێکی شاری دێلوڕانی سەر بە پارێزگای ئیلامی رۆژهەڵاتی کوردستان روویداوە، دوو لە ژەهراویبووەکان تەمەنیان 30 و 52 ساڵە.
بە گوتەی حەمید سەفەرپوور، بەڕێوەبەری فریاکەوتنی پارێزگای ئیلام، یەکێک لە ژەهراویبووەکان منداڵێکی تەمەن دوو ساڵانە، کە لەدوای گەیاندنی بە نەخۆشخانە، دەستبەجێ شوشتنەوەی گەدەی بۆ کراوە.
حەمید سەفەرپوور ئاماژەی بەوەش کرد، ئێستا دۆخی تەندروستیی هەر سێ هاونیشتمانییەکان جێگیرە، بەڵام بۆ چاودێریی زیاتر لە نەخۆشخانە دەمێننەوە.
ساڵانە سەرەڕای هۆشداریی شارەزایانی تەندروستی، خەڵکێکی زۆر بەهۆی خواردنی قارچکی شاخییەوە ژەهراوی دەبن و رەوانەی نەخۆشخانە دەکرێن.
بەگوێرەی راپۆرتێکی بەڕێوەبەرایەتیی گشتیی فریاکەوتنی ئێران، کە رۆژی 8ی نیسانی 2025 بڵاوکراوەتەوە، لە هەفتەیەکدا 30 کەس بەهۆی خواردنی قارچکی شاخی، لە ئێران و رۆژهەڵاتی کوردستان ژەهراوی بوون.
سکچوون، سکئێشە، تا، رشانەوە، وشکبوونەوەی دەم و سەرئێشە، بەشێک لە نیشانەکانی ژەهراویبوونن بە قارچک، تەنانەت هەندێک کات کاریگەریی ژەراویبوونەکە دەگاتە ئاستی گیانلەدەستدان.
