رووداو دیجیتاڵ
بەڕێوەبەری گشتیی پاسپۆرتی سلێمانی رایگەیاند، ئەمڕۆ لە ماوەی پێنج خولەکدا پاسپۆرتیان بۆ کەسێک دەرهێناوە، کە تووشی رووداوێکی نەخوازراو ببوو و پێویستی بە چارەسەر بوو لە دەرەوەی وڵات.
رۆژی چوارشەممە، 19ـی شوباتی 2025، عەمید سالار عەبدوڵڵا، بەڕێوەبەری گشتیی پاسپۆرتی سلێمانی بە تۆڕی میدیایی رووداوی راگەیاند، ئەو کەسەی پاسپۆرتەکەی لەو ماوە کەمەدا بۆ دەرهێنرا، لە کاتی کارکردن کەوتووەتە ژێر تراکتۆر، بەو هۆیەوە قاچێکی لەدەستداوە.
بەڕێوەبەری گشتیی پاسپۆرتی سلێمانی گوتی "ئەو نەخۆشە دۆخی زۆر خراپ بوو، قاچێکی لەدەستدابوو، قاچەکەی دیکەش بەکار نەمابوو، تاوەکو کارەکانی نەوەستێت، لە ماوەی پێنج خولەکدا پاسپۆرتمان بۆ دەرهێنا تاوەکو بچێتە دەرەوەی وڵات بۆ چارەسەر."
ئەو کەسەی پاسپۆرتەکەی بۆ دەرهێنراوە، گەنجێکی تەمەن 18 ساڵانە، لە کاتی جووتکردن، کەوتووەتە ژێر تراکتۆرەکەی، ئەمڕۆ بە ئەمبیوڵانسێک گەیێندرایە پاسپۆرتی سلێمانی و کارەکانی دەرهێنانی پاسپۆرتەکەی بۆ راییکرا.
دەرهێنانی پاسپۆرتی نوێ یان نوێکردنەوەی لە عێراق و هەرێمی کوردستان ئەلیکترۆنییە، داواکار بەر لەوەی سەردانی بەڕێوەبەرایەتیی پاسپۆرت بکات، دەبێت پێشتر لە رێگەی ئەپڵیکەیشینی (iraqi passport) نۆرە بگرێت.
