رووداو دیجیتاڵ
وەزارەتی پەروەردە رایگەیاند، 28 قوتابخانەی نوێ بۆ خوێندنی ئەم ساڵ ئامادەن و ژمارەیەک قوتابخانەی دیکەش کاریان تێدا دەکرێت.
رۆژی پێنجشەممە، بەرپرسێکی باڵا لە وەزارەتی پەروەردە بە تۆڕی میدیایی رووداوی راگەیاند: "لە ساڵی 2025ـدا 28 قوتابخانەی نوێ تەواو بوون و بۆ خوێندنی ئەم ساڵ ئامادەن، هەروەها 30 قوتابخانەی دیکەش ئێستا کاریان تێدا دەکرێت و تەواو نەبوون".
بە گوتەی ئەو بەرپرسە، لە کابینەی نۆیەمی حکومەتی هەرێمی کوردستان 242 قوتابخانە دروستکراون.
سەبارەت بە وەرگرتنی قوتابیانیش ئەو سەرچاوەیە گوتی: "تاوەکو ئەمڕۆ نزیکەی 150 هەزار قوتابی لە پۆلی یەکی بنەڕەتی تۆمارکراون."
نەژاد عەبدوڵڵا، بەڕێوەبەری گشتیی پەروەردەی سلێمانی بە تۆڕی میدیایی رووداوی راگەیاند: "ئەم ساڵ لە سنووری پارێزگای سلێمانی چوار قوتابخانەی نوێ تەواو بوون؛ نۆژەنکردنەوەی قوتابخانەکانیش بەردەوامە".
بە گوتەی نەژاد عەبدوڵڵا، تاوەکو 8ـی ئەم مانگە 26 هەزار و 988 قوتابی لە قۆناخی یەکی بنەڕەتی و باخچەکانی منداڵان ناویان تۆمار کردووە.
نەژاد عەبدوڵڵا گوتی: "ئەم ساڵ زیاتر لە 417 هەزار و 345 قوتابی لە سنوورەکەمان دەخوێنن".
زیاتر لە 400 هەزار قوتابی لە سنووری پارێزگای سلێمانی لە هەزار و 410 قوتابخانەدا دەخوێنن، ئەمە جگە لە پەروەردەکانی ئیدارە سەربەخۆکانی گەرمیان و راپەڕین.
هەروەها لە کۆی نزیکەی 6 هەزار قوتابخانەی هەرێمی کوردستان، بەگوێرەی ئاماری بەڕێوەبەرایەتیی گشتیی پەروەردەی دهۆک بۆ رووداو، هەزار و 470 قوتابخانە لە سنووری پارێزگاکەدان و زیاتر لە 400 هەزار قوتابی تێیاندا دەخوێنن.
وەزارەتی پەروەردە رایگەیاندووە، 21ـی ئەیلوولی 2025، دەستپێکی وەرزی نوێی خوێندن دەبێت لە سەرجەم قوتابخانەکانی هەرێمی کوردستان.
.webp&w=3840&q=75)