وێنە؛ یاریی سینی و زەرف لە شەوانی رەمەزان لە هەولێر

یاریزانان بەدەم خواردنەوەی چا، خواردنی شەوچەرە و میوزیک و گۆرانییەوە، تاوەکو نزیکی پاشیڤ بەردەوامن لە یاریکردن. 

سینی و زەرف یارییەکی دێرینە و زیاتر لە 200 ساڵە لە شەوانی رەمەزاندا لە هەولێر دەکرێت. جگە لە هەولێر، لە کەرکووکیش یارییەکی باوە. 

هەر لە گەڕەکی تەعجیل خولێک بۆ یاریزانانی سەرانسەری هەرێمی کوردستان کراوەتەوە و براوە خەڵاتی گرانبەها دەباتەوە. 

ئەو یارییە کولتوورییە لە سینییەک و 11 فنجان پێکهاتووە، لەژێر یەکێک لە فنجانەکاندا موروویەک دەشاردرێتەوە، ئەو کەسەی مورووەکە بدۆزێتەوە، دەبێتە براوەی یارییەکە. هاوشێوەی ئەم یارییە، کاڵەمشتێ و کڵاوکڵاوێنە. 

نەبەز مستەفا بە رووداوی راگەیاند، بۆ ئەم ساڵ 96 تیپیان ئامادەکردووە، تیپەکان لە شارەکانی هەولێر، کەرکووک و پردێوە بەشدارن. خەڵاتەکانیش بریتین لە سێ ئایفۆنی 15 پرۆماکس، 2 ئایفۆنی 14 پرۆماکس و گەشتێکی دووبەی کە بۆ براوەکان ئامادە کراون. 

نەبەز دەشڵێت، ئامانجی ئەو ئەوەیە کە ئەو یارییە کۆنە نەمرێ، "چەند ساڵێک پێش ئێستا خەریک بوو نەمێنێ، من دووبارە زیندووم کردەوە."