گرووپێکی خۆبەخش لە کەمپی باسرمە سەری 200 کەس چاک دەکەن

ئەو گرووپە گەنجە پێشتر لە گوندەکان و مزگەوتەکان لە رۆژانی هەینیدا خۆبەخشانە ئەو هەڵمەتەیان کردووە. رێباز فەرحان کە سەرپەرشتیی گرووپەکە دەکات بە رووداوی گوت: "ئێمە بۆ خزمەتکردن و خێری خۆمان ئەم کارە دەکەین. پێشتر لە گوند و مزگەوتەکان ئەم کارەمان دەکرد، بەڵام ئەم جارە بڕیارماندا لەم کەمپە سەری کۆمەڵێک پەنابەر چاکبکەین، بە خۆشحاڵییەوە گەورە و بچووک ئامادەبوون و سەری زیاتر لە 200 کەسمان چاککرد." 

وەک رێباز فەرحان دەڵێت، دەزگای خێرخوازیی بارزانی هۆکارێکی دیکە بووە کە لەو کەمپە ئەو هەڵمەتە بکەن، چونکە لە هەموو روویەکەوە یارمەتییان داون. دەشڵێت، "ئەمە وامان لێدەکات پەرە بە هەڵمەتەکەمان بدەین بۆ کەمپەکانی دیکەی هەرێمی کوردستان." 

کەمپی باسرمە دەکەوێتە ناحیەی باسرمەی سەر بە پارێزگای هەولێر لەو کەمپەدا زیاتر لە 300 ماڵی پەنابەرانی رۆژئاوای کوردستان نیشتەجێن.