منداڵە ونبووەکەی هەڵەبجە داوادەکات حکومەت کەیسەکەی یەکلابکاتەوە

رۆژی چوارشەممە، 15-2-2023، دادگەی باری کەسێتیی هەڵەبجە لەبارەی کەیسی هاوڕێ ئەنوەر کۆبووەوە، لەلایەن پارێزەرەکەیەوە بەڵگەی پشکنینی DNA بەغدا پێشکێشی دادگە کرا کە دەریدەخات 100٪ کوڕی مەحموود فەتاحە، بەڵام دادگە بڕیاری کۆتایی لەوبارەیەوە نەدا.

رۆژی پێنجشەممە، 16-3-2023، هاوڕێ ئەنوەر، ئەو منداڵەی کە ئەنجامی پشکنینەکانی DNA دەریخستووە کوڕی مەحموود فەتاحە، لە کاتی بەشداریکردنی لە بەرنامەی نوڕۆژی تۆڕی میدیایی رووداو کە هەوراز گوڵپی و جەعفەر رەشید پێشکێشی دەکەن گوتی: "پێشتر دەمگوت بەناوێک دەژیم کە ناوی من نییە، بەڵام ئێستا بەناوێک دەژیم ناوی خۆمە و لە ئەمڕۆوە ناوم کوردەوانە."

بەڵام مەحموود فەتاح دوێنێ بە رووداوی گوت: "بەهیچ شێوەیەک هاوڕێ کوڕی من نییە، من کوڕەکەمم بەدەستی خۆم ناشتووە، خەڵک بۆ بڕوا بەو قسانە دەکەن، باشە ئەگەر کوڕی منە 34 ساڵە لەکوێیە بۆ ئێستا دەرکەوتووەتەوە، ئەمە دەستێک دروستیکردووە."

مەحموود فەتاح لە کاتی کیمیابارانی هەڵەبجە سێ منداڵی بێسەروشوێن بوون، دوو کوڕ و کچێک، پێشتر کوڕ و کچێکی دۆزراوەتەوە بەناوی شکار و ماردین، بەبێ پشکنینی DNA بەو نیشانانەی کە هەیانبووە وەک منداڵەکانی خۆی قبوڵی کردوون، دوای نزیکەی 20 ساڵ سکاڵای لەسەر هەردوو منداڵەکە تۆمار کردووە و داوای پشکنینی DNAـی کردووە، دوای ئەوەی ماردین گیان لەدەستدەدات دەست لە سکاڵاکان هەڵدەگرێت و ئێستا دووبارە سکاڵای لەسەر شکار تۆمارکردووەتەوە.

هاوڕێ بەمشیوەیە باسی چیرۆکی خۆی دەکات: ساڵی 1988 ملازمێکی سوپای عێراق منی لە هەڵەبجەوە دۆزییەوە و بردمی بۆ بەغدا، رادەستی خانەی بێسەرپەرشتانی کەڕادەی کردم، لە 30-8-1988 دوای 14 رۆژ لە کیمیابارانی هەڵەبجە پیاوێک بەناوی ئەنوەر لە خانەی بێسەرپەرشتان منی هەڵگرتەوە و بردمی بۆ کەرکووک و منی کرد بە کوڕی خۆی و ناوی نام: ھاوڕێ و ناسنامەی بۆ دەرکردم. ساڵی 2021 ئەنوەر بە کۆرۆنا کۆچی دوایی کرد، من و دایکم واتا هاوژینەکەی ئەنوەر لەسەر میرات کێشە کەوتە نێوانمانەوە و گوتیان: "تۆ کوڕی ئێمە نیت و هەڵەبجەیت بڕۆ بەدوای کەسوکارتدا بگەڕێ."

هاوڕێ دوای ئەوەی دێتە هەڵەبجە پشکنینی DNA لە سلێمانی دەکات ئەنجامی پشکنینەکە دەریدەخات کە 98٪ هاوشێوەی مەحموودە، دوای ئەوەی مەحموود پشکنینەکە رەتدەکاتەوە جارێکی دیکە لە بەغدا پشکنین دەکات، ئەنجامی پشکنینەکەی 100٪ هاوشێوەی پشکنینی خوشکێکی مەحموود و کچێکی مەحموود بە ناوی ئەژی و مەحموود خۆی بووە.

دوای ئەوەی دوێنێ پارێزەری هاوڕێ ئەنجامی پشکنینەکەی پزیشکی دادی بەغدا پێشکێشی دادگەی باری شارستانی هەڵەبجە کرد، مەحموود فەتاح پشکنینەکانی رەتکردەوە و گوتی کە پەسەندی ناکات و دادگە هەر بڕیارێک لەسەر بنەمای ئەو پشکنینانە بدات رەتیدەکاتەوە.

باخان جەلال، پارێزەری منداڵە ونبووەکانی هەڵەبجە و پارێزەری هاوڕێش بە رووداوی گوت، بە نووسراوی فەرمیی دادگەی باری شارستانیی هەڵەبجە داوای لە پزیشکی دادی بەغدا کردووە ئایا دادگە دەتوانێت بە نووسراوی فەرمی 100٪ لە رووی بایۆلۆژییەوە هاوڕێ بە کوڕی مەحموود ئەژمار بکرێت؟ بە گوتەی باخان جەلال، دوای ئەوەی وەڵامی پزیشکی دادی بەغدا هاتەوە دادگەی باری شارستانیی هەڵەبجە بڕیاری کۆتایی دەدات، ئەگەر مەحموود فەتاح بە بڕیارەکە رازیبێت دەبێتە بڕیاری کۆتایی، ئەگەر رازیش نەبێت دەتوانێت داوای پشکنینی دیکە بکات و تێچووی پشکنینی دووەم بگرێتە ئەستۆ، ئەگەریش وانەکات دەتوانێت لە دادگەی تێهەڵچوونەوە تانە لە بڕیاری دادگەی هەڵەبجە بدات.

مەحموود فەتاح رژدە لەسەر ئەوەی کە هاوڕێ کوڕی ئەو نییە و ئەو منداڵەکەی بە دەستی خۆی ناشتووە، هاوڕێش رژدە لەسەر ئەوەی کە منداڵێ مەحموودە و دەڵێت: بەڵگەنامەی مردنم بۆ دەرکراوە لە 13-3-1988 لە کاتێکدا کارەساتی هەڵەبجە 16-3 بووە، لە بەڵگەنامەیەکی دیکەش هاتووە کە من 16-3-1988 گیانم لەدەستداوە، بێجگە لەو دوو بەڵگەنامە ناکۆکە باوکم "مەحموود" دەڵێت: بە دەستی خۆم ناشتوومە، بەڵام با شایەتێک بهێنێت، کە ئەو منداڵەکەی خۆی ناشتووە، لە بەرامبەریشدا من دەیان بەڵگە دەهێنمەوە کە کوڕی ئەوم.

هاوڕێ، کە ئێستا ناوی خۆی ناوەتەوە کوردەوان دەشڵێت: هیچ وەرەسەیەکم لە سەروەت و سامانی کاک مەحموود ناوێت تەنیا سۆز و خۆشەویستیم دەوێت. مەحموود فەتاحیش دەڵێت: هیچ سەروەتێکی نییە و تەنیا 500 هەزار مووچەی مانگانەی خانەنشینی هەیە، بۆیە رەتکردنەوەی هاوڕێ پەیوەندی بە وەرەسەوە نییە، بەڵکو پەیوەندی بەوەوە هەیە کە دڵنیایە کە ئەو کوڕە کوڕی ئەو نییە.

هاوڕێ ئەنوەر داوادەکات حکومەتی هەرێمی کوردستان و وەزارەتی شەهیدان و ئەنفالکراوان دەستوەردان لە کەیسەکەی بکەن و دووبارە پشکنینی DNA بۆ خۆی و باوکی و پووری و خوشکەکەی بکەن، بەڵام باوکی دەڵێت لە ئەمریکاش پشکنین بکات رەتیدەکاتەوە.