رووداو دیجیتاڵ
گوتەبێژی حەج و عومرە دەڵێت، بەهۆی جەڵتەی دڵەوە عومرەکارێکی دانیشتووی دهۆک دوای مانگێگ مانەوەی لە نەخۆشخانە، ئەمڕۆ لە شاری مەککە کۆچی دواییکرد.
رۆژی شەممە، 15ـی ئاداری 2025، کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە تۆڕی میدیایی رووداوی راگەیاند، "عومرەکارێکی دانیشتووی پارێزگای دهۆک کە بە مەبەستی عومرە سەردانی سعودیەی کردبوو، دوای بەجێگەیاندنی سوننەتی عومرە تووشی جەڵتە دەبێت و دوای مانگێک مانەوە لە نەخۆشخانە ئەمرۆ کۆچی دواییکرد."
گوتەبێژی بەڕێوەبەرایەتیی حەج و عومرە دەڵێت، "لەو ماوەیەی لە نەخۆشخانە بووە، بەردەوام لەلایەن نووسینگەی دهۆکی حەج و خاوەن کۆمپانیاکە چاودێری کراوە."
ئەو عومرەکارە ناوی ئەحمەد حەسەن محەممەدە و تەمەنی سەرووی 70 ساڵە. کاروان ستوونی گوتی، "دوای وەرگرتنی رەزامەندی خانەوادەکەی لە شاری مەککە بەخاک دەسپێردرێت."
ئەحمەد حەسەن حەوتەم عومرەکاری باشووری کوردستانە کە ئەمساڵ لە سعودیە کۆچی دوایی بکات.
