رووداو دیجیتاڵ
بەراورد بە سەرەتای ئەم مانگە، نرخی مریشکی زیندوو لە هەرێمی کوردستان بەرزبووەوە و کیلۆی گەیشتە سێ هەزار دینار.
محەممەد عومەر، مریشکفرۆش لە شاری هەولێر ئەمڕۆ پێنجشەممە 14-11-2024 بە تۆڕی میدیایی رووداوی گوت: "ئەمڕۆ نرخی کیلۆیەک مریشک بە سێ هەزار دینارە".
03ـی ئەم مانگە کیلۆیەک مریشکی زیندوو لە هەرێمی کوردستان بە 2500 دینار بوو.
لەبارەی هۆکاری بەرزبوونەوەی نرخەکە ئەو مریشکفرۆشە گوتی: "وەرزی سەرمایە و مریشکیش کەمبووەتەوە، ئەوە هۆکاری سەرەکی بەرزبوونەوەی نرخە".
بەگوێرەی وەزارەتی کشتوکاڵ و سەرچاوەکانی ئاوی هەرێمی کوردستان، ساڵانە زیاتر لە 105 ملیۆن مریشک لە هەرێمی کوردستان گەورە دەکرێن کە بەرهەمەکەیان نزیکەی 250 هەزار تۆن گۆشتە، لەکاتێکدا پێداویستیی ساڵانەی گۆشتی مریشک لە نێوخۆدا 146 هەزار تۆنە. ئەوەی لە پێداویستیی نێوخۆ زیاترە هەناردەی پارێزگاکانی عێراق دەکرێت.
لە هەرێمی کوردستان خواستی زۆر لەسەر مریشکی زیندووە بەراورد بە بەستوو. بۆ دابینکردنی مریشکیش هەزار و 840 پەلەوەرخانە هەن، بەڵام بەشێوەی هەمیشەیی هەموویان بەرهەمیان نییە.
ژمارەی پەلەوەرخانەکان بەپێی پارێزگاکان:
- هەولێر: 576 پەلەوەرخانە
- سلێمانی: 727 پەلەوەرخانە
- دهۆک: 344 پەلەوەرخانە
- هەڵەبجە: 35 پەلەوەرخانە
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ