رووداو - هەولێر
خوێندكارێكی كورد كە خوێندنی ماستەرەكەی لە چینە، لە یەكێك لە زانكۆ بەنێوبانگەكانی ئەو وڵاتە زمانی كوردی فێری چینیەكان دەكات، یەكێك لە قوتابییەكانیشی لە نووسینی داڕشتنی كوردیدا نمرەی تەواوی بەدەستهێناوە.
هەرێم عەلی حەسەن، 22 ساڵ، خەڵكی گوندی سێوەیسە لە دەڤەری پشدەر و دانیشتووی رانیەیە، دەرچووی كۆلێژی بایۆلۆژییە لە زانكۆی سلێمانی، ئێستاش ماستەر لە بواری ئەندازیاریی ژینگە لە زانكۆی (بێیهانگ )ی چین دەخوێنێ. لە هەمانكاتدا مامۆستای زمانی كوردییە لە زانكۆی پەكین.
هەرێم باسی چوونی بۆ زانكۆی پەكین دەكات و دەڵێت برادەرێكی كە كوردی رۆژهەڵاتی كوردستانە، پەیوەندیی پێوە كردووە كە زانكۆی پەكین پێویستی بە مامۆستایەكی زمانی كوردییە، چونكە چەند قوتابییەكی چینی داوایان لە سەرۆكایەتی زانكۆكە كردبوو كە حەز دەكەن فێری زمانی كوردی ببن.
هەرێم لەسەر داوای هاوڕێكەی دەچێتە زانكۆی پەكین، سەرەتا لەگەڵ دكتۆر لین، سەرۆكی بەشی زمانی عەرەبی لە زانكۆی پەكین لەبارەی چۆنیەتی وانە گوتنەوەكە قسە دەكات و دواتر كچێك وەك یاریدەدەری ئەو بەشە لە گوتنەوەی وانەكە یارمەتی دەدات.
هەرێم لە كوردستان تەنیا لە سەرەتایی و ئامادەیی زمانی كوردی خوێندووە، هیچ ئەزموونێكیشی لەبارەی وانەگوتنەوە نەبووە، بۆیە پەیوەندی بە چەند شارەزایەكی زمانی كوردی دەكات و چەند سەرچاوەیەكیان لێوەردەگرێ.
كوردی بە حەوت قوتابی چینی دەڵێت
هەرێم باسی ئەو خوێندكارانە دەكات كە وانەی پێدەگوتنەوە و دەڵێت "خوێندكارەكانم چوار كوڕ و سێ كچ بوون، چواریان پێشتر بكالۆریۆسیان لە زمانی عەرەبی لە زانكۆی پەكین بەدەستهێنابوو، هەروەها بە زمانی عەرەبی باشیش قسەیان دەكرد، بەڵام سێ خوێندكارەكەی دیکە کەمتر لەوان لەبارەی زمانی عەرەبی دەیانزانی".
هەرێم یەكەم كەس بووە لە زانكۆی پەكین وانەی زمانی كوردی بڵێتەوە، وانەی زمانی كوردیش سەر بە بەشی زمانی عەرەبی بووە.
هەرێم رۆژی 21/9/2016 لە زانكۆی پەكین وەكو مامۆستای زمانی كوردی دەستبەكار دەبێت و لە یەكەم وانەشدا باسی سرووشتی كوردستان و کولتوور و خواردنی كوردی بۆ قوتابییەكانی دەكات. شارەكانی كوردستانیش بە داتاشۆ پێشانی قوتابییەكانی دەدات.
هەرێم ناوی كوردی و عەرەبی بۆ قوتابییەكان دادەنێت و دەڵێت "ناوم لە قوتابییەكان نا (دانا، كامەران، میران، فاتیمە، بانو، خۆزی و هەرێز)".
هەرێم بە دوو وانە قوتابییەكانی فێری ئەلف و بێی كوردی دەكات، چونكە وەك خۆی دەڵێت چوار لەو خوێندكارانە پێشتر زمانی عەرەبییان خوێندبوو، بەهۆی ئەوانیشەوە خوێندكارەكانی دیكە بەزوویی شارەزای پیتەكان بوون.
هەرێم باسی حەزی ئەو قوتابییە چینیانە دەكات بۆ فێربوونی زمانی كوردی و دەڵێت "زۆر جددی بوون و باش دەیانخوێند، پرسیاری زۆر سەیریان لەبارەی رێزمانی كوردی و وانەی كوردی دەكرد".
هەرێم جگە لە گوتنەوەی وانەی زمانی كوردی، قوتابییەكانیشی ئاشنا كردووە بە گۆرانی و میوزیكی كوردی. ئەو دەڵێت "رۆژانە گوێمان لە گۆرانیی كوردی دەگرت و ئەوان لەگەڵ دەنگی هونەرمەندان گۆرانییەكانیان دەگوتەوە".
فیچەری رووداوی پێ نیشاندان
خوێندكارەكان داوایان لە هەرێم كردووە، هەموو كاتەكە تەنیا بە وانە گوتنەوە نەكوژێ، بەڵكو بە وێنە و ڤیدیۆ ئاشنای دابونەریت و كولتووری كوردییان بكات. ئەو دەڵێت "سەرەتای هەموو دەرسەكانم بە شتی زۆر سەرنجڕاكێش دەستی پێدەكرد، بۆ نموونە لە یەكێك لە ڤیدیۆكاندا فیچەرێكی روودام نیشاندان كە باس لە ئاهەنگی بووكگواستنەوە بەشێوەی كوردەواری دەكات، بەلایانەوە جوان و سەرنجڕاكێش بوو".
هەرێم رۆژی 29/12/2016 تاقیكردنەوەی كۆتایی بە خوێندكارەكان كردووە. شەش پرسیار بۆ خوێندكارەكانی دێنێتەوە و دەڵێت "پرسیاری شەشەمی تاقیكردنەوەكە داڕشتن بوو، دەبووایە لەسەر ژیانی خۆیان بنووسن".
یەکێک لە قوتابییەکان لە داڕشتنی کوردی نمرەی تەواوی هێناوە
ئەو باسی یەكێك لە قوتابییەكانی دەكات و دەڵێت "ئەو قوتابییە ناوی لی شانگ بوو، من ناوم لێنابوو دانا، بە راستیش دانابوو، چونكە داڕشتنێكی زۆر جوانی بە زمانی كوردی لەسەر چین نووسیبوو، منیش لەو پرسیارە نمرەی تەواوم پێدا و كۆی نمرەكانیشی 99 بوو".گوتیشی "كەمترین نمرە لە وانەی كوردی كە دوو قوتابیی هێنایان 86 بوو".
هەرێم تەنیا سێ مانگ(وەرزێکی خوێندن) لەو زانكۆیە وانەی گوتووەتەوە، پێشنیازی بۆ كراوە ساڵی داهاتووش بەردەوام بێت. ئەو گوتی "وا بڕیارە ساڵی داهاتوو ئەگەر خوێندكارێكی زۆر داوای ئەو وانەیە بكەن، بەشێكی تایبەت بە زمانی كوردی لەو زانكۆیە بكرێتەوە".
