رووداو دیجیتاڵ
لە پارێزگای ئیلامی رۆژهەڵاتی کوردستان، دەست بەسەر 75 کیلۆگرام مادەی هۆشبەردا گیرا و 3 کەسیش بە تۆمەتی بازرگانیکردن و بەقاچاخبردنی مادەی هۆشبەر دەستگیرکران.
عەبدولوەهاب بەخشندە، داواکاری گشتیی ئیلام رایگەیاند، دوای کۆکردنەوەی زانیاری لەبارەی تۆڕێکی مادەی هۆشبەر، ئۆپەراسیۆنێک لەلایەن تیمەکانی بەرەنگاربوونەوە و نەهێشتنی مادە هۆشبەرەکانی پارێزگاکەوە لە شاری ئیلام ئەنجام درا.
عەبدولوەهاب بەخشندە گوتی، "لە ئۆپەراسیۆنەکەدا دەست بەسەر 75 کیلۆگرام مادەی هۆشبەردا گیرا و 3 کەسیش دەستگیرکران."
داواکاری گشتیی ئیلام گوتیشی، دۆسیەی تایبەت بۆ ئەو کەسانە کراوەتەوە و بە تۆمەتی بازرگانیکردن و بەقاچاخبردنی مادەی هۆشبەر رادەستی لایەنە پەیوەندیدارەکانی دەسەڵاتی داد کراون.
بە گوتەی داواکاری گشتیی ئیلام، "دەسەڵاتی داد بێ چاوپۆشیکردن رووبەڕووی قاچاخچیان و فرۆشیارانی مادەی هۆشبەر دەبێتەوە."
بە گوتەی ئیرەج کاکاوەند، بەڕێوەبەری پۆلیسی بەرەنگاربوونەوە و نەهێشتنی مادە هۆشبەرەکانی ئێران، ساڵی رابردوو زیاتر لە 580 تۆن مادەی هۆشبەر لە ئێران دەستی بەسەردا گیراوە؛ هەزار و 680 تۆڕی بەقاچاخبردن و فرۆشتنی مادەی هۆشبەریش هەڵوەشێندراونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ