رووداو دیجیتاڵ
لیوا مەریوان شێخ کەمال، سەرپەرشتیاری دەروازەی سنووریی نێودەوڵەتیی باشماخ بە تۆڕی میدیایی رووداوی راگەیاند، زیاتر لە 200 دەروێشی شێخ محەممەدی کەسنەزانی بە شمشێر، چەقۆ و خەنجەر هێرشیان کردووەتە سەر بازگەیەکی ئاسایش لە دەروازەی سنووریی نێودەوڵەتیی باشماخ.
ئەو دەروێشانە لە سنووری ئێرانەوە هاتوونەتە هەرێمی کوردستان، بەپێی ئەو ڤیدیۆیانەی بۆ رووداو هاتوون، لەکاتی گەیشتنیان بە دەروازەی سنووریی نێودەوڵەتیی باشماخ، دەنگی تەقەیەکی زۆر، هاواری خەڵک و دەهۆڵ دەبیسترێت. دەروێشەکان بە راکردن سنوور دەبەزێنن.
بەپێی ڤیدیۆیەکی دیکە کە لەلایەن جوامێر حوسێن تایبەت بۆ رووداو نێردراوە، دەروێشێک دەردەکەوێت کە خوێن بە جەستەیەوەیە، ئەو کەسەی ڤیدیۆکەی ناردووە دەڵێت، "بە گولـلەی پاسدارانی ئێران برینداربووە".
لیوا مەریوان شێخ کەمال، سەرپەرشتیاری دەروازەی سنووریی نێودەوڵەتیی باشماخ، ئەوەشی خستەڕوو جگە لەوەی ئێستا قەدەخەی هاتووچۆ هەیە بەهۆی رێكارەكانی ڤایرۆسی كۆرۆنا، ئەو دەروێشانە هیچ بەڵگەیەكی گەشتكردنیان پێنەبووە. گوتیشی "دەبوو لە دیوی ئێرانەوە رێگەیان لێبگیرایە و نەهێڵدرایە بێنە ناو خاكی هەرێمی كوردستان".
لە یەکێک لەو ڤیدیۆیانەی بۆ رووداو نێردراون، دەردەکەوێت کە دەروێشەکان بە ئاسانی لە سنووری هەرێمی کوردستان تێدەپەڕن و یەکێک لە ئاسایشەکان دەرگەیان بۆ دەکاتەوە. سەرپەرشتیاری دەروازەی سنووریی نێودەوڵەتیی باشماخ ئاماژەی بەوەشکرد، هێزەکانی ئاسایش ویستوویانە رێگرییان لێبکەن "بەڵام تاوەكو ئێستاش نەتوانراوە بگەڕێنرێنەوە بۆ دیوی ئێران".
هاتنی ئەو درەوێشانە بەمەبەستی بەشداریکردنیانە لە مەراسیمی بەخاكسپاردنی تەرمی شێخ محەممەدی كەسنەزانی كە بڕیارە رۆژی هەینی 10-7-2020 بەخاكبسپێدرێ.
