07-06-2020
22:54
تووشبووانی کۆرۆنا لە هەرێمی کوردستان هەزار و 300 کەسی تێپەڕاند
لە هەولێر تائێستا 387 کەس تووشی ڤایرۆسی کۆرۆنا بوون. وێنە: بڵند تاهیر - رووداو
وەزارەتی تەندروستیی حکومەتی هەرێمی کوردستان رایگەیاند، لە هەولێر 15 کەسی دیکە تووشی ڤایرۆسی کۆرۆنا بوون، بەمەش کۆی گشتیی تووشبووانی کۆرۆنا لە هەرێمی کوردستان بۆ هەزار و 310 تووشبوو بەرزبووەوە.
وەزارەتی تەندروستی لە راگەیێندراوێکدا ئاماژەی بەوە کردووە "لە بەردەوامیی پشکنینەکان و گەڕان بەدوای تووشبووان، 15 تووشبووی دیکەی ڤایرۆسی کۆرۆنای نوێ COVID-19 لە پارێزگای ھەولێر دەستنیشانکران، کە ھەشت ئافرەت و دوو پیاو و سێ منداڵ و کوڕ و کچێکی گەنجن".
بەپێی زانیارییەکانی وەزارەتی تەندروستی، حەوت لە تووشبووەکان بەرکەوتووی تووشبووانی پێشوون، حەوت تووشبوو نیشانەی نەخۆشییەکەیان ھەیە و تووشبووەکەی دیکەش لە ئێران گەڕاوەتەوە و لە کەرەنتین بووە.
تووشبووە نوێیەکانی شاری هەولێر، دانیشتووی گەڕەکەکانی رۆشنبیری، فەرمانبەران، باداوە، رزگاری، کرێکاران، شەھیدان، زانیاری، ئازادی، برایەتی، ناحیەی بنەسڵاوە و ناحیەی رزگارین.
لە هەولێر تائێستا 387 کەس تووشی ڤایرۆسی کۆرۆنا بوون، لەو ژمارەیەش 243 کەسیان چاکبوونەتەوە و سێ چوار تووشبووش گیانیان لەدەستداوە.
لە هەرێمی کوردستان کۆی گشتیی تووشبووانی کۆرۆنا بۆ هەزار و 310 تووشبوو بەرزبووەتەوە، لەو ژمارەیەش 458 تووشبوو چاکبوونەتەوە و 24 تووشبووش گیانیان لەدەستداوە.
22:30
لە سلێمانی 71 تووشبووی نوێی کۆرۆنا تۆمارکران
تەندروستیی هەرێمی کوردستان دەڵێت، لە پارێزگای سلێمانی 71 تووشبووی دیکەی کۆرۆنا تۆمارکران، 40 کەسیان نیشانەکانی نەخۆشی کۆرۆنایان هەیە.
بەپێی راگەیێندراوێکی وەزارەتی تەندروستیی هەرێمی کوردستان، لەو 71 کەسە، 38 پیاو و 23 ئافرەت و چوار منداڵ و چوار کوڕی گەنج و دوو کچی گەنج هەن، 31 تووشبوو بەرکەوتووی تووشبووانی پێشوون و 40 تووشبووش نیشانەی نەخۆشیەکەیان ھەیە.
هەروەها لە هەولێرش 15 تووشبووی نوێی کۆرۆنا تۆمارکران. بەمەش کۆی گشتیی تووشبووانی کۆرۆنا لە هەرێمی کوردستان بۆ هەزار و 310 تووشبوو بەرزبووەوە.
ئێستا هەزار و 310 کەس لە هەرێمی کوردستان تووشی کۆرۆنا بوون. لەو ژمارەیە 458 کەس چاکبوونەتەوە و 24 کەسیش گیانیان لەدەستداوە.
20:07
10 تووشبووی کۆرۆنا لە هەولێر چاکبوونەوە
کۆی گشتیی ئەوانەی لە هەولێر چاکبوونەتەوە گەیشتووەتە 243 کەس. وێنە: بڵند تاهیر - رووداو
بەڕێوەبەری گشتیی تەندروستیی هەولێر رایگەیاند، 10 تووشبووی دیکەی کۆرۆنا چاکبوونەتەوە و کۆی گشتیی ئەوانەی چاکبوونەتەوە گەیشتووەتە 243 کەس.
د. دلۆڤان محەممەد فاتح جەلال، بەڕێوەبەری گشتیی تەندروستیی هەولێر رایگەیاندووە "10 نەخۆشی تووشبوو بە ڤایرۆسی کۆرۆنا COVID – 19 دوای وەرگرتنی چارەسەری پزیشکی بەتەواوی چاکبوونەوە و باری تەندروستییان تەواو جێگیر بووەتەوە، پشکنینی تایبەتی یەک لەدوای یەکیان بۆ کرایەوە کە نێگەتیڤ بوو، بڕیاردرا بنێردرێنەوە ماڵەوە".
دەقی راگەیێندراوی بەڕێوەبەری گشتیی تەندروستیی هەولێر:
• هاوڵاتیانی خۆشەویستی شاری هەولێر پێتان ڕادەگەیەنین کە (۱٠) نەخۆشی تووشبوو بە ڤایرۆسی کۆڕۆنا COVID – 19 دوای وەرگرتنی چارەسەری پزیشکی بەتەواوی چاکبوونەوە و باری تەندروستییان تەواو جێگیر بۆتەوە، وە پشکنینی تایبەتی یەکیان لەدوای یەکییان بۆ کرایەوە کە نێگەتیڤ بوو و بڕیاردرا بنێردرێنەوەماڵەوە.
• کۆی گشتی چابووەکان گەیشتە (۲٤۳) کەس.
• سوپاسی پابەندبوونتان دەکەین بۆ ڕێنماییە خۆپارێزییەکان، جێبەجێکردنی ڕێنماییەکان زامنی زاڵبوونمانە بەسەر ئەم پەتا جیهانیە.
• زۆر سوپاسی ماندووبوونی تەواوی پزیشکان و کارمەندانی تەندروستی و تەواوی هێزەکانی ناوخۆ دەکەین کە پارێزگاری لە تەندروستی هاوڵاتیان دەکەن.
د. دلۆڤان محمدفاتح جلال
بەڕێوەبەری گشتی تەندروستی هەولێر
۷ی حوزیرانی ۲٠۲٠
19:58
دوو کەسی دیکە لە دهۆک تووشی ڤایرۆسی کۆرۆنا بوون
تووشبووەکان بەرکەوتووی تووشبووانی پێشوون
وەزارەتی تەندروستیی حكومەتی هەرێمی کوردستان رایگەیاند، دوو کەسی دیکە لە سنووری پارێزگای دهۆک تووشی ڤایرۆسی کۆرۆنا بوون، کە دوو ئافرەتن و بەرکەوتووی تووشبووانی پێشوون.
وەزارەتی تەندروستی رایگەیاندووە "لە بەردەوامی پشکنینەکان و گەڕان بەدوای تووشبووان، دوو تووشبووی دیکەی ڤایرۆسی کۆرۆنای نوێ COVID-19 لە پارێزگای دھۆك دەستنیشانکران، کە دوو ئافرەت تەمەن 48 و 44 ساڵن، بەرکەوتووی تووشبووانی پێشوون و لە کەرەنتین بوون".
بەپێی راگەیێندراوەکەی وەزارەتی تەندروستی، هەردوو تووشبووەکە دانیشتووی ناو شاری دھۆکن.
19:32
نەرمین کاوانی تووشی کۆرۆنا بووە
نەرمین کاوانی
نەرمین کاوانی، خانمە شانۆکار و ئەکتەری کورد لە شاری سلێمانی تووشی کۆرۆنا بووە و لەژێر چاودێری پزیشکدایە.
سەرچاوەیەک لە وەزارەتی تەندروستیی هەرێمی کوردستان بە تۆڕی میدیایی رووداوی راگەیاند، یەکێک لەو تووشبووانەی کۆرۆنا کە ئەمڕۆ لەلایەن وەزارەتی تەندروستییەوە راگەیێندراوە نەرمین کاوانییە، ئێستا لە نەخۆشخانەیەکی سلێمانی لەژێر چاودێری دایە.
نەرمین کاوانی لە دایکبووی شاری سلێمانییە و دەرچووی پەیمانگەی هونەرە جوانەکانی ئەو پارێزگایەیە، لە ماوەی رابردوودا لە چەندین درامادا بەشداری کردووە و لە چەندین شانۆگەریدا رۆڵی بینیوە.
ژمارەی تووشبووانی کۆرۆنا رۆژ بە رۆژ لە بەرزبوونەوەدایە. بەپێی ئامارەکانی وەزارەتی تەندروستیی هەرێمی کوردستان تاوەکو ئێستا 1222 کەس تووشی کۆرۆنا بوون و 448 کەسیش چاکبوونەتەوە. ئێستا 750 تووشبوو لە نەخۆشخانەکاندا ماون و چارەسەری پزیشکییان بۆ دەکرێت.
هەروەها لە ماوەی 24 کاژێری رابردوودا شەش کەس لە سنووری پارێزگای سلێمانی بەهۆی کۆرۆنا گیانیان لەدەستداوە. کۆی گشتی ئەو کەسانەیشی تاوەکو ئێستا لە هەرێمی کوردستان گیانیان لەدەستداوە گەیشتووەتە 24 کەس. 20 کەسیان لە سلێمانی گیانیان لەدەستداوە و چوار کەسیش لە سنووری پارێزگای هەولێر.
15:08
لە 24 کاژێری رابردوودا لە هەرێمی کوردستان 133 کەس تووشی ڤایرۆسی کۆرۆنا بوون
لە 24 کاژێری رابردوودا لە هەرێمی کوردستان 133 کەس تووشی ڤایرۆسی کۆرۆنا بوون
رووداو - هەولێر
وەزارەتی تەندروستیی حکومەتی هەرێمی کوردستان ئاماری رۆژانەی ڤایرۆسی کۆرۆنای بڵاوکردەوە و رایگەیاند، لە 24 کاژێری رابردوودا 133 کەس تووشی ڤایرۆسی کۆرۆنا بوون.
لە راگەیێندراوەکەی وەزارەتی تەندروستیدا ئاماژە بەوە کراوە، لە سەرەتای بڵاوبوونەوەی ڤایرۆسی کۆرۆناوە 12 هەزار و 815 کەس کەرەنتین کراون و ئێستا 776 کەس لە کەرەنتیندا ماونەتەوە.
وەزارەتی تەندروستی رایدەگەیێنێت کە لە 24 کاژێری رابردوودا هەزار و 774 پشکنین بۆ دەستنیشانکردنی ڤایرۆسی کۆرۆنا کراون و بەوەیش تاوەکو ئێستا 87 هەزار و 590 پشکنین کراون.
لە راگەیێندراوەکەدا ئەوە خراوەتە ڕوو کە پێنج کەس گیانیان لەدەستداوە و 133 تووشبووی نوێیش دەستنیشان کراون کە بە گوێرەی پارێزگاکان بەم جۆرەن:
هەولێر: 39 تووشبوو
سلێمانی: 91 تووشبوو
دهۆک: سێ تووشبوو
تاوەکو ئێستا لە هەرێمی کوردستا هەزار و 222 کەس تووشی ڤایرۆسی کۆرۆنا بوون، لەو ژمارەیە 448 کەس چاکبوونەتەوە و 24 کەسیش گیانیان لەدەستداوە.
12:00
کارگێڕێکی مەڵبەندی چەمچەماڵی یەکێتی بە کۆرۆنا گیانی لەدەستدا
کارگێڕێکی مەڵبەندی چەمچەماڵی یەکێتی بە کۆرۆنا گیانی لەدەستدا
کارگێڕی مەڵبەندی 12ی چەمچەماڵی یەکێتیی نیشتمانیی کوردستان دوای تووشبوونی بە ڤایرۆسی کۆرۆنا، ئەمڕۆ گیانی لەدەستدا.
مەڵبەندی 12ی چەمچەماڵی یەکێتیی نیشتمانیی کوردستان رایگەیاند، فوئاد حەمەخان، کارگێڕی مەڵبەندەکە "ئەمڕۆ بە نەخۆشی کۆرۆنا گیانی لەدەستدا".
تەنیا ئەمڕۆ لە پارێزگای سلێمانی چوار تووشبووی کۆرۆنا گیانیان لەدەستدا، کە پیاوێک و سێ ژنن و کارگێڕەکەی مەڵبەندی چەمچەماڵی یەکێتی یەکێکە لەوان. 20 تووشبووی دیکەش هەر لە سلێمانی دۆخیان ناجێگیرە.
فوئاد حەمە خان لەدایکبووی ساڵی 1972 بوو، جگە لە کاروباری حیزبی، هونەرمەند و شانۆكارێكی دیاری چەمچەماڵ بوو و سەرۆكی تیپی شانۆیی (سپی حەسار) بوو.
ماوەیەكە تووشی ڤایرۆسی كۆرۆنا ببوو، چەند رۆژێك لەمەوبەر بەهۆی خراپیی رەوشی تەندروستی لە نەخۆشخانەی ئاسوودەی چەمچەماڵەوە گوازرایەوە سلێمانی و ئەمڕۆ بەهۆی کۆرۆنا گیانی لەدەستدا.
زیاتر بخوێنەوە
15:01
ژمارەی تووشبووانی کۆرۆنا لە هەرێمی کوردستان گەیشتە هەزار و 310 کەس
ئاماری تووشبووانی ڤایرۆسی کۆرۆنا لە هەرێمی کوردستان
جێگری بەڕێوەبەری گشتیی تەندروستیی سلێمانی رایگەیاند، تووشبوویەکی دیکەی ڤایرۆسی کۆرۆنا لە سلێمانی گیانی لەدەستدا و بەوەیش ئەمڕۆ لەو پارێزگایە پێنج کەس گیانیان لەدەستداوە.
د. هێرش سەلیم، جێگری بەرێوەبەری گشتیی تەندروستیی سلێمانی ئاماژەی بەوە کرد، بە گیانلەدەستدانی ئەم تووشبووە، ئەمڕۆ لە پارێزگای سلێمانی پێنج تووشبووی ڤایرۆسەکە مردوون.
جێگری بەڕێوەبەری گشتی تەندروستی سلێمانی، لە لێدوانێکدا بۆ ئەرکان عەلی پەیامنێری رووداو لەبارەی رەوشی تەندروستیی تووشبووانی کۆرۆناوە رایگەیاندبوو، بەهۆی خراپی رەوشی تەندروستی تووشبووەکان سەرقاڵی گواستنەوەی نەخۆشەکانین لە نەخۆشخانەی شەهید تاهیری عەلی والی بەگ بۆ نەخۆشخانەی شەهید دکتۆر ئاسۆ، کە شوێنی چاودێریی چڕی باشترە و فراوانترە. هەروەها دەشڵێت، "ئێمە لە دوو رۆژی رابردوو زیاتر لە 15 نەخۆشمان گواستووەتەوە کە لە بارێکی تەندروستیی سەختدان".
د. هێرش سەلیم، ئاشکرای کرد، "كێشەی شوێنی مانەوەی نەخۆشمان نییە، بەڵام ژمارەیەكی زۆر لە نەخۆشەكان كە نزیكەی 20 نەخۆشێك دەبن دۆخی تەندروستییان زۆر خراپە و پێویستیان بە چاودێری ورد هەیە و تەمەنیشیان لەنێوان 45 بۆ 70ساڵیدایە".
یەکێک لەو کەسانەی ئەمڕۆ لە پارێزگای سلێمانی گیانی لەدەستدا ناوی "باسم ساڵح عەبدولستار"ە کە 59 ساڵ بووە و کارمەندی بەڕێوەبەرایەتیی گشتیی کارەبای سلێمانی بووە.
تاوەکو ئێستا لە هەرێمی کوردستان هەزار و 222 تووشبووی کۆرۆنا تۆمارکراوە کە 448 تووشبوو چاکبوونەتەوە و 24 تووشبوویش بەو هۆیەوە گیانیان لەدەستداوە.
زیاتر بخوێنەوە