بازرگانێک: خواست لەسەر سۆپای کارەبایی بەشێوەیەکی...

گالەری

بازرگانێک: خواست لەسەر سۆپای کارەبایی بەشێوەیەکی بەرچاو زیادیکردووە

04-11-2024

12 Photos

بڵند تاهیر @Bilindtahir

رووداو دیجیتاڵ

لەگەڵ نزمبوونەوەی پلەی گەرما و هاتنی وەرزی سەرما هاونیشتمانییان روویان لە کڕینی سۆپای کارەبایی کردووە. بازرگانێکیش دەڵێت ئەم ساڵ خواست لەسەری 80٪ زیادیکردووە.

لوقمان گۆران، بازرگانێکی کەلوپەلی کارەباییە لە هەولێر بە تۆڕی میدیایی رووداوی گوت: "ئەم ساڵ خەڵکێکی زۆر روویان لە کڕینی هیتەر کردووە لە چاو پار رێژەکە 80٪ زیادیکردووە."

ئەو بازرگانە هۆکارەکەی بۆ ئەوە دەگەڕێنێتەوە ئەم ساڵ گۆڕانکاری لە سیستمی هیتەرەکان هەیە و بە وزەیەکی کەم هاونیشتمانیان دەتوانن بەکاریبهێنن و لە رووی نرخیشەوە گونجاون.

لوقمان گۆران دەشڵێت: "ئەگەر ساڵی داهاتوو کارەبا ببێتە 24 کاژێری، کەس نەوت بەکارناهێنێت و ئەم جۆرە هیتەرانە لە هەموو ماڵێکدا دەبن، چونکە هێزی هیتەرەکان لە نیو ئەمپێر کارەباوە دەستپێدەکات و بە وزەکی کەم گەرمایەکی باش و تەندروست و سەلامەت دەبەخشن. نرخەکەیشیان لە 15 هەزار دینارەوە دەستپێدەکات."

ئەحمەد سەعدوون، هاونیشتمانییەکی شاری هەولێرە بۆ کڕینی هیتەر رووی لە بازاڕ کردبوو، بە رووداوی گوت: "هیتەر دەکڕم چونکە هەستیاریم بە بۆنی نەوت هەیە. لە رووی تەندروستیشەوە هیتەر باشترە، چونکە سۆپای نەوت بۆن و گاز فڕێدەدات. دەتوانم بە وزەیەکی کەم و تەنانەت بە کارەبای موەلیدەش بەکاریبهێنم."

ئەو هاونیشتمانییە دەڵێت، سۆپای نەوت لە رابروو دا کێشەی زۆری بۆ دروستکردووە: "زۆر جار بیستوومانە کە چەند کەس بەهۆی گازی سۆپاوە گیانیان لەدەستداوە."

لە ساڵانی رابردوو دا بەهۆی کەمیی پێدانی کارەبای نیشتمانی و نەبوونی سیستمی ئینڤێرتەر لە هیتەر و بابەتە ئەلیکترۆنییەکان، هاونیشتمانییان نەیاندەتوانی بەشێوەیەکی بەرچاو سوود لە هیتەر وەربگرن. بەڵام ئەم ساڵ بەهۆی سیستمی ئینڤێرتەر یاخود کەم وزە خواستی زۆر لەسەر سۆپای کارەباییش هەیە.