رووداو دیجیتاڵ
کۆبوونەوەی هاوبەشی مەکتەبی سیاسیی پارتی دیموکراتی کوردستان و یەکێتیی نیشتمانیی کوردستان لە دەباشان بەڕێوەچوو و دەڵێن، لەسەر سێ خاڵی سەرەکی هاوڕابوون لەنێویاندا، دانانی پارێزگارێکی کورد بۆ کەرکووک.
ئەمڕۆ یەکشەممە، 4ـی شوباتی 2024، مەکتەبی سیاسیی پارتی دیموکراتی کوردستان و یەکێتیی نیشتمانیی کوردستان لە دەباشان کۆبوونەوە و لەدوای کۆتاییهاتنی کۆبوونەوەکەیان، راگەیێندراوێکی هاوبەشیان بڵاوکردەوە.
بەگوێرەی راگەیێندراوە هاوبەشەکە، ئەو پرسانەی لە کۆبوونەوەکەدا تاوتوێ کراون بریتی بوون لە: هەڵسەنگاندن و گفتوگۆ لەسەر بارودۆخی سیاسی و ئابووریی هەرێمی کوردستان و کێشەچارەسەر نەکراوەکان لەگەڵ حکومەتی فیدراڵ، بودجە و بژێوی ژیان و موچەی فەرمانبەران و هەڵبژاردنەکانی ئەنجوومەنی پارێزگاکان.
لەدوای کۆبوونەوەکە، مەکتەب سیاسیی هەردوو حیزبەکە لەسەر سێ خاڵی سەرەکی هاوڕابوون؛ دیاریکردنی پارێزگارێکی کورد بۆ کەرکووک، پاراستنی قەوارەی هەرێمی کوردستان و لە ئاستێکی باڵادا هەوڵی چارەسەرکردنی کێشەی بودجە و مووچە بدرێت.
خاڵە هاوبەشەکان بەمشێوەیە باس کراون:
1. هەردوولا کۆک بووین لەم قۆناخەدا لەپێناو بەرژەوەندیی هاووڵاتیانی پارێزگای کەرکووک بە هەموو پێکهاتەکانیەوە، پارێزگارێکی کورد دیاری بکرێت بۆ خزمەتی خەڵکی شار و شارۆچکەکان.
2. هەردوولا هاوڕا بووین ئەرکی سەرشانی یەکێتی و پارتی و سەرجەم لایەنە کوردستانییەکانە قەوارەی هەرێم بپارێزن و پارێزگاری لە دەستکەوتەکانی شۆڕش و خەبات و خوێنی شەهیدانى کوردستان بکەین.
3. بۆ چارەسەری کێشە سیاسی و ئابوورییەکانی هەرێم لەگەڵ حکومەتی فیدراڵی لەئاستێکی باڵا هەردوولا پێکەوە هەوڵی چارەسەرکردنی کێشەکان بەگشتی و بژیوی و ژیان و خزمەتگوزاری و بودجە و مووچە بدەین بە تایبەتی.
شاندەکەی پارتی پێکهاتبوون لە، فازڵ میرانی، ئازاد بەرواری، مەحموود محەممەد، عەلی حوسێن و جەعفەر ئیمنیكی. هەروەها لە کۆبوونەوەکەدا شاندەکەی یەکێتی پێکهاتبوون لە بافڵ تاڵەبانی، دەرباز کۆسرەت، سەعدی پیرە، سالار سەرحەد و ئاراس ئاغا.
.png "کۆبوونەوەی پارتی و یەکێتی لە دەباشان.")
دوای هەڵبژاردنی ئەنجوومەنی پارێزگاکانی عێراق کە لە 14 پارێزگای عێراق و کەرکووک بەڕێوەچوو، ئەمە یەکەم کۆبوونەوەی پارتی و یەکێتییە لە ئاستی باڵادا.
دوایین کۆبوونەوەی دوو حیزبە سەرەکییەکەی هەرێمی کوردستان، 7ـی مانگی 11ـی ساڵی رابردوو بوو کە لە ئاستی مەکتەبی سیاسیدا لە پیرمام کۆبوونەوە.
![وێنەیەکی ماناییە [ناڕاستییە] و بە ژیریی دەستکرد دروستکراوە.](https://www.rudaw.net/s3/rudaw.net/ContentFiles/843992Image1.jpg?mode=crop&quality=70&rand=1&scale=both&w=362&h=226&version=7260914 "وێنەیەکی ماناییە [ناڕاستییە] و بە ژیریی دەستکرد دروستکراوە.")
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ