رووداو – سلێمانی
چەمی سوورە قەڵات پێش چەند ساڵێک پڕ بوو لە ئاو، سەرچاوەی ئاوی دەیان گوندی قەزای ماوەتی شارباژێڕ بووە. مام سەڵاح، موختاری گوندەکە دەڵێت، ئێستا ئاوەکە ئەوەندە کەمی کردووە، زۆرینەی خەڵکی گوندەکانی ماوەت بە تانکەر ئاو دەکڕن.
سەڵاح مستەفا، موختاری گوندی سوورە قەڵات بە رووداوی گوت، "گوندی سوورە قەڵات 300 ماڵە، هەروەها گوندی کێلەش 40 ماڵ دەبێت، سەرچاوەی ئاوی هەردوو گوندەکە ئەم چاڵە ئاوەیە، چەم نەماوە و بووە بە چاڵێک ئاو، ئەگەر ئەمەش نەمێنێت ئاومان نابێت بیخۆینەوە، چونکە تەنها لە گوندەکەی ئێمە 12 کانی هەبوون، ئەوانیش هەمووی وشک بوون."
هەڵکەندنی بیری نایاسایی و دەستدرێژی و زیادەڕۆییش بۆ سەر ئاوی چەم و رووبارەکان هۆکارێکی دیکەن بۆ کەمبوونەوەی سەرچاوەکانی ئاو.
ژمارەیەک پسپۆڕی ئاو مەترسییەکە گەورەتر دەبینن و دەڵێن، ساڵانی داهاتوو بەهۆی نەمانی ئاو لە هەندێک ناوچەی عێراق و هەرێمی کوردستانیش کۆچکردن بەهۆی بێئاوییەوە روودەدات.
بەڕێوەبەری گشتیی سەرچاوەکانی ئاو لە هەرێمی کوردستان پێیوایە گرفتی گەورە زۆر بەکارهێنانی ئاو و بە زانستی بەڕێوەنەبردنیەتی.
د. کاروان سەباح، بەڕێوەبەری گشتیی سەرچاوەکانی ئاو لە هەرێمی کوردستان بە رووداوی راگەیاند، "ئەم چەند ساڵەی دوایی، داهاتی ئاو ساڵانە لە هەرێمی کوردستان کەمی کردووە، ساڵی رابردوو تەنها 30%ی ئاوی پێویست هاتووەتە خەزانەکانی ئێمە، کە پێویستە هەبێت، واتە 70%ی داهاتی ئاویمان لەدەستداوە، هەروەها ئەمساڵ 50%ی ساڵیکی ئاسایی ئاومان هەبووە، دیاریش نییە ساڵی داهاتوو چۆن دەبێت."
رەحمان خانی، بەڕێوەبەری گشتیی بەنداوەکان لە حکومەتی هەرێمی کوردستان بە رووداوی راگەیاند، "ئێمە لە پلانماندایە ئەمساڵ چوار بەنداو تەواو بکەین، کە خەزنی ئاوییان تێدا مسۆگەر بکەین."
بەرپرسانی حکومەتی عێراق دەڵێن، کارەساتەکە لە باشووری عێراقەوە بەرەو باکوور هەڵدەکشێت ئەگەر هەماهەنگی بۆ چارەسەر نەبێت.
حاتەم حەمید، نوێنەری وەزیری سەرچاوە ئاوییەکانی عێراق بە رووداوی گوت، "هاوکاری و هەماهەنگیی نێوان حکومەتی عێراق و هەرێمی کوردستان، لە لایەنی سیاسی و کارگیڕی و هونەرییەوە زۆر هاوکار دەبێت بۆ کەمکردنەوەی ئەو زیانانەی کە بەهۆی گۆڕانکاریی ژینگەییەوە لە وڵاتەکەمان کەوتووە، هەروەها هاوکار دەبێت بۆئەوەی ئەو ئاوەی هەمانە بەشمان بکات، هاوکاریکردن و هەماهەنگی لە نێوانماندا بژاردە نییە، بەڵکو پێوستییە بۆ تێپەڕاندنی ئەو قەیرانانە، چونکە لە ساڵانی داهاتوودا گەورەتر دەبن."
دراوسێکانی حەز دەکەن زۆرترین پشکیان هەبێت لە بەڕێوەبەرێتیی سیاسی عێراق، بەڵام بۆ ئاو بە پێچەوانەوەن، رۆژ لەدوای رۆژ بەنداوی زیاتر لەسەر رێڕەوی سەرچاوە ئاوییەکانیان بۆ عێراق دروست دەکەن و ئاوی کەمتر بۆ بەردەدەنەوە، ئەمەش لە کاتێکدایە کە عێراق 75%ی ئاوەکەی لە دەرەوەی وڵاتەکەی دابین دەبێت.
