کارمەندێکی تەندروستی لە تورکیا ڤاکسین لە خانمێک دەدات. وێنە: رووداو
رووداو - تەندروستی
لە تورکیا پزیشک و پەرستاران لە مووچەکانیان ناڕازین و چوونیان بۆ ئەورووپا زیادی کردووە، شەوکەت هەرکی لەم بارەیەوە راپۆرتێکی کردووە و چەند پزیشکێکی دواندووە.
بەپێی ئامارەکانی سەندیکای کارمەندانی تەندروستیی تورکیا، ساڵی رابردوو سێ هەزار و 25 پزیشک چوونەتە ئەورووپا، لە کاتێکدا لە ساڵی 2022، ژمارەکە دوو هەزار و 685 پزیشک بوو.
تەنانەت پێشبینیدەکرێت تاوەکو کۆتایی ئەمساڵ ئەو ژمارەیە بگاتە سێ هەزار و 500 پزیشک، د. مستەفا سێڵڤی، بەڕێوەبەری سەندیکای کارمەندانی تەندروستیی ئامەد بە رووداوی گوت، رۆژ بە رۆژ دۆخی کارمەند و پەرستاران خراپتردەبێت، ئەمەش وایان لێدەکات کە کۆچ بکەن.
تەنانەت د. مستەفا سێڵڤی گوتیشی، مووچەکانیان لەخوار هێڵی هەژارین و پێویستیان بە زیادکردن هەیە، چونکە لەژێر گوشاری دەروونی و جەستەییدان.
لە کۆنگرەی نوێی سەندیکاکە ئەوەش ئاشکراکرا کە 76.3٪ـی پەرستاران دەیانەوێت کۆچبکەن بۆ ئەورووپا.
سەندیکاکە راپۆرتی خۆی لەو بارەیەوە پێشکێشکرد و رایدەگەیێنێت، بە زووترین کات رێگەچارەی نوێ و کاریگەر بۆ پرسەکە بدۆزرێتەوە، تاوەکو کەرتی تەندروستی و ژیانی نەخۆشەکان نەکەوێتە مەترسییەوە.
د. ئەردۆغان کۆسە، ئەندامی سەندیکاکە دەڵێت: ''ئێمە کێشەی زۆریی ماوەی کارکردن و کەمیی مووچەمان هەیە، تەنانەت ژمارەی فەرمانبەریشمان کەمە و پزیشکەکانمان لەم وڵاتە رێزیان ناگیرێت''.
تەنانەت ئەو پزیشکە ئاماژە بەوەشدەکات، تووندوتیژی بەرامبەر پزیشکان دەکرێت و مووچەکانیان لە ئاستی ماندووبونیان نییە.
بەپێی ئامارەکانی تەندروستیی تورکیا، بۆ هەر 100 هەزار کەسێک، 228 پزیشک و 356 پەرستار هەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ