کوردیKURDÎENGLISHTÜRKÇEعربي
Rudaw Logo
راستەوخۆ
کوردستانهەواڵە ناوخۆییەکاندیاسپۆرا
رۆژهەڵاتی نێوەڕاست
جیهانئابووریهەڤپەیڤینتەندروستیپۆدکاستبیروڕاکولتووروەرزشمەڵتیمیدیابەرنامەکاندۆکیۆمێنتاری
راستەوخۆ
Rudaw

ئەپلیکەیشنی رووداو دابەزێنە

App StoreGoogle Play
نهێنیپارێزی•مەرج و بەندەکان

© 2026 هەموو مافەکان پارێزراون.

Rudaw

ئەپلیکەیشنی رووداو دابەزێنە

App StoreGoogle Play
نهێنیپارێزیمەرج و بەندەکان

© 2026 هەموو مافەکان پارێزراون.

جووتیارێکی نابینا لە باتیفا خاوەنی 500 دارە و بە تەنیا خزمەتیان دەکات

جووتیارێکی نابینا لە باتیفا خاوەنی 500 دارە و بە تەنیا خزمەتیان دەکات

گەڕانەوە17/11/2026

جووتیارێکی نابینا لە باتیفا خاوەنی 500 دارە و بە تەنیا خزمەتیان دەکات

کەڤین حوسێن

رووداو - باتیفا


لە نێو سرووشتی جوانی گوندی خەندەک سەر بە قەزای باتیفا لە ئیدارەی سەربەخۆی زاخۆ، ئازاد محەممەد نموونەیەکی خۆڕاگری و ئیرادەی نیشان داوە. ئازاد لە ساڵی 1983دا، کاتێک تەمەنی شەش ساڵ بوو و لە پۆلی یەکی سەرەتایی دەیخوێند، لە ماوەی شەو و رۆژێکدا بەهۆی کێشەی تۆڕی چاوەوە بینایی خۆی لەدەستدا، بەڵام ئەمە نەبووە رێگر لەبەردەم کارکردن و بەڕێوەبردنی ژیانیدا.

 

ئازاد محەممەد لەبارەی ئەو شەوەی بینایی لەدەستدا و بێئەنجامبوونی چارەسەرەکانەوە دەڵێت: "ساڵی 1983 بوو، لە پۆلی یەکی سەرەتایی بووم. شەوەکەی خەوتم و بەیانی کە هەستام هەمووی تاریک بوو، وامزانی کارەبا بڕاوە یان شتێک کەوتووەتە بەردەم چاوم. دواتر چووینە لای پزیشک و تەنانەت چووینە موسڵ و بەغداش، هەموو پشکنینێکیان بۆ کردم، بەڵام گوتیان تۆڕی چاوی وشك بووە و چارەسەری نییە".

 

ئەو بە تەنیا و بەبێ یارمەتیی هیچ کەسێک کارەکانی باخداری و جووتیاری دەکات؛ تەنانەت لە رێگەی دەستلێدان و بۆنکردنەوە جۆری میوە و کاتی پێگەیشتنیان دەزانێت و زیاتر لە 500 داری هەنجیر، هەنار و قەیسی لە باخەکەیدا چاندووە.


ئازاد محەممەد لەبارەی کارکردنی لەنێو باخ و ئاژەڵەکانیدا دەڵێت: "بە دەستلێدان و بۆنکردن دەزانم کام میوە پێگەیشتووە؛ تەنانەت دەزانم رەنگی هەنارەکە سوورە یان سەوز. نزیکەی 500 داری هەنجیر، هەنار و قەیسیم هەیە و خۆم هەموویان ئاو دەدەم و خزمەتیان دەکەم. جگە لە باخەکە، مەڕ و ماڵاتیشم هەیە و بە تەنیا خزمەتیان دەکەم، چیم پێویست بێت بە دەستەکانی خۆم دەیکەم".

 

ئازاد باوکی نۆ منداڵە و سەرەڕای ئەرکی قورسی کارکردن، بانگبێژی مزگەوتی گوندەکەشیانە و دەڵێت: "من هیچ گلەییەکم لە خودای گەورە نییە، هەمیشە سوپاسگوزارم. دەچمە مزگەوت، بانگ دەدەم و نوێژەکانم دەکەم و خێزانەکەشم بەڕێوەدەبەم. نابینایی نەبووەتە رێگر لەبەردەممدا، چونکە دەست و بیر و ئیرادەم لەدەست نەداوە".