ژنە فۆتۆگرافەرێک یادەوەریی کۆڵانە کۆنەکانی سلێمانی دەپارێزێت

لە نێو کۆڵانە دێرێنەکانی شاری سلێمانیدا، ژنە فۆتۆگرافەرێک هەوڵدەدات پێش ئەوەی بە یەکجاری بڕووخێندرێن، دوایین شوێنەواری تەلارسازیی دیوار و دەرگە کۆنەکانی شارەکەی لە چوارچێوەی وێنەدا بهێڵێتەوە. سارا نامۆ، کە پیشەی سەرەکیی فەرمانبەرە، ماوەی چەندین ساڵە هەوڵەکانی بۆ ئەرشیڤکردنی خانوو و گەڕەکە دێرینەکانی سلێمانی خستووەتەگەڕ.
سارا نامۆ، دانیشتووی شاری سلێمانییە و لەپاڵ کاری فەرمانبەریدا، لە ساڵی 2005ـەوە گرنگی بە بواری وێنەگرتن دەدات. لە ساڵی 2019ـەوە، دوای ئەوەی تێبینی کرد ئەو کۆڵان و خانووە دێرینانەی لە منداڵیدا رێگەی رۆژانەی بوون بەرەو قوتابخانە، مەترسیی لەناوچوون و رووخانیان لەسەرە، پڕۆژەیەکی تایبەتی بۆ بەدیکۆمێنتکردن و ئەرشیڤکردنی تەلارسازیی کۆنی سلێمانی دەستپێکرد.
سارا نامۆ، سەبارەت بە هۆکاری دەستپێکردنی پڕۆژەکەی دەڵێت: "ئەو کۆڵانانە بەشێکن لە یادەوەریی منداڵیم. کاتێک بینیم رۆژ لەدوای رۆژ ئەو خانووە مێژووییانە دەڕووخێندرێن و شوێنەکانیان دەکرێنە گەراج، هەستێکی نیگەرانیی لا دروست کردم. هەر بۆیە لە ساڵی 2019ـەوە بڕیارمدا بەپێی توانای خۆم، وردەکاریی تەلارسازیی دەرگە، پەنجەرە و شێوازی بیناسازیی ئەو خانووانە ئەرشیڤ بکەم."
پڕۆژەکەی سارا نامۆ جگەلە وێنەگرتن هەوڵێکە بۆ تۆمارکردنی مێژوو و ناسنامەی ئەندازیاریی خانووەکان. بۆ ئەم مەبەستە، سەردانی ئەو بنەماڵانە دەکات کە خاوەنی خانووەکان بوون، زانیاری لەبارەی مێژووی دروستکردن، ناوی وەستا و ئەندازیارەکان و وێنە کۆنەکانی پەیوەست بە خانووەکە کۆدەکاتەوە.
سارا نامۆ، دەڵیت: "کارەکەی من تەنیا دیکۆمێنت کردن نییە، بەڵکو گەڕانە بەدوای مێژووی خانووەکەدا؛ کێ دروستی کردووە، وەستاکەی کێ بووە و چ چیرۆکێک لەگەڵ ئەو خانووەدا گێڕدراوەتەوە. بە هاوکاریی کەسایەتییە خەمخۆرەکانی شارەکە، زانیاریی زارەکی و وێنەی کۆنی بنەماڵەکانم کۆکردووەتەوە."
بینینی رووخاندنی خانوویەک کە پێشتر وێنەی گرتووە و کراوەتە گەراج، نیگەرانیی لای سارا نامۆ دروست دەکات، بەڵام لە هەمان کاتدا دڵخۆشە بەوەی توانیویەتی بەر لە لەناوچوونی، مێژووەکەی تۆمار بکات.
سارا نامۆ، سەبارەت بە ئامانجی داهاتووی پڕۆژەکەی گوتی: "پلانم هەیە سەرجەم ئەم زانیاری و وێنە ئەرشیڤکراوانە لە کتێبێکدا چاپ و بڵاو بکەمەوە، تاوەکو وەک سەرچاوەیەکی مێژوویی بۆ نەوەکانی داهاتووی سلێمانی بمێنێتەوە. هەرچەندە ئەم پڕۆژەیە لە توانای تاکە کەسێک گەورەترە و پێویستی بە پشتگیریی دامەزراوەیی هەیە، بەڵام من لەبەر خۆشەویستیم بۆ مێژووی شارەکەم، بەپێی توانای خۆم لە کارەکەم بەردەوام دەبم."